වෙනස්ම රසයක කෑමක් දැල්ලෝ ඩෙවල්

වෙනස්ම රසයක කෑමක් දැල්ලෝ ඩෙවල් – Devilled Squid

දැල්ලෝ කියන්නේ සී ෆුඩ් අතරෙ ජනප්‍රියම කෑමක්. ගොඩක් අය පුරුදුවෙලා ඉන්නෙ දැල්ලො කරියක් විදිහට හදා ගන්න. ඒත් මේ දැල්ලො ඩෙවල් එක කියන්නෙ වෙනස්ම රසයක් තියෙන කෑමක්. කටට රසට කන්න කැමති අයට ගැලපෙනම කෑමක්. ගෙදරදිම දැල්ලො ඩෙවල් එකක් හදා ගන්නෙ කොහොමද බලමු. 

අවශ්‍ය ද්‍රව්‍ය

දැල්ලෝ 500g

ලොකු ළූණු ගෙඩි 2ක්

මාළු මිරිස් කරල් 2ක්

තක්කාලි ගෙඩියක්

අමුමිරිස් කරල් 3, 4ක්

ඉඟුරු, සුදුළූණු පේස්ට් තේ හැඳි 1ක්

කෑලි මිරිස් මේස හැඳි 1½ක්

ගම්මිරිස් කුඩු තේ හැඳි 1ක්

කහ කුඩු තේ හැඳි ¼ක්

සෝයා සෝස් මේස හැඳි 1ක්

තක්කාලි සෝස් මේස හැඳි 2ක්

සීනි තේ හැඳි ½ක්

රස අනුව ලුණු

පොල්තෙල් අවශ්‍ය පමණට

කරපිංචා

රම්පේ

සාදන ආකාරය

මුලින්ම දැල්ලෝ හොඳින් පිරිසිදු කරලා සෝදාගෙන රවුමට කපාගන්න. දැල්ලෝ ටිකට කහ කුඩු, ලුණු සහ ගම්මිරිස් කුඩු ටිකක් එකතු කරලා හොඳට කලවම් කරගන්න. මේ විදිහට විනාඩි දහයක් විතර සීසන් වෙන්න තියන්න.

දැන් තාච්චියක් ලිපේ තියලා පොල්තෙල් ටිකක් දාලා හොඳට රත් කරගන්න. තෙල් රත් වුණාට පස්සෙ දැල්ලෝ ටික තාච්චියට දාලා විනාඩි 3–4ක් විතර බැදගන්න. දැල්ලො ගොඩක් වෙලා බැදගන්න එපා. එතකොට තද ගතිය වැඩි වෙනවා. බැදගත් දැල්ලො ටික වෙනම භාජනයකට අයින් කරගන්න.

ඊළඟට දැල්ලෝ බැදගත් තෙල් තාච්චියටම තවත් තෙල් ස්වල්පයක් තවත් එකතු කරලා ඒකට රම්පේ සහ කරපිංචා දමා සුවඳ එනතුරු බැදගන්න. මේකට ඉඟුරු, සුදුළූණු පේස්ට්ත් එකතු කරලා තත්පර කිහිපයක් බැදගන්න. ඊට පස්සෙ ලොකු ළූණු, මාළු මිරිස් සහ අමුමිරිස් එකතු කරලා වැඩි තෙම්පරාදු කරගන්න. දැන් ලිපේ ගින්දර අඩු කරලා කෑලි මිරිස් සහ ඉතිරි ගම්මිරිස් කුඩු ටිකත් එකතු කරන්න. ඊළඟට සෝයා සෝස්, තක්කාලි සෝස් සහ සීනි එකතු කරලා හොඳට කලවම් කර ගන්න. සීනි ස්වල්පයක් එකතු කිරීමෙන් සෝස්වල සැර රසය බැලන්ස් කර ගන්න පුළුවන්.

දැන් දැල්ලෝ ටික තාච්චියට එකතු කර ගන්න. ඒකටම ලොකුවට කපාගත් තක්කාලිත් දාලා හොඳට කලවම් කරලා විනාඩි කිහිපයක් පමණ පිසගෙන ලිපෙන් බාගන්න.