නාසිගුරාන් එකක් හරියට, රසට හදාගමු

නාසිගුරාන් එකක් හරියට, රසට හදාගමු – Nasi Goreng

එක එක රටවල ඒ රටටම ආවේණික විදිහට හදන ෆ්‍රයිඩ් රයිස් වර්ග තියෙනවා. මේ රයිස් වර්ග අතරින් ලංකාවෙ ජනප්‍රියම රයිස් එකක් තමයි නාසිගුරාන් කියන්නෙ (Nasi Goreng). මේක ඉන්දුනීසියාවට ආවේණික ගොඩක් රටවල ජනප්‍රිය කෑමක්. පවුලේ හැමෝටම රසවිඳින්න, ඩිනර් එකකට වගේම විශේෂ උත්සව අවස්ථාවකටත් හොඳටම ගැළපෙනවා. නාසිගුරාන් එකක් නිවැරදිව රසට හදාගන්න විදිහ බලමු. මේකට උණු බත් වෙනුවට කලින් දවසෙ පිසූ බත් ෆ්‍රිජ් එකේ තියලා ගත්තොත් වඩාත් රසවත්. 

• අවශ්‍ය ද්‍රව්‍ය

පිසගත් බාස්මතී බත්

සිහින්ව කොටු කපාගත් කුකුල් මස් 150 g

පොතු ඉවත් කරගත් ඉස්සන් 100g

රවුමට කපාගත් දැල්ලන් 100g

කොටු කපාගත් කැරට් 100g

සිහින්ව කපාගත් ගෝවා 100g

සිහින්ව කපාගත් ළූණු කොළ 100g

ලොකු ළූණු ගෙඩියක්

රතු මිරිස් කරල් දෙකක් හෝ බෙල් පෙපර් ගෙඩි භාගයක්

ඉඟුරු-සුදුළූණු පේස්ට් තේ හැඳි 2ක්

සෝයා සෝස් සහ ෆිෂ් සෝස් අවශ්‍ය පමණට

ලුණු

ගම්මිරිස් කුඩු

බටර් හෝ තෙල් මේස හැඳි 1ක්

බිත්තර 2ක්

චිලි පේස්ට් මේස හැඳි 1ක්

• සාදන ආකාරය

ඉස්සෙල්ලම ලොකු පෑන් එකක් ලිපේ තියලා ඒකට බටර් ටික දාලා රත් කරගෙන කපාගත් කුකුල් මස්, ඉස්සන් සහ දැල්ලන් එකතු කර හොඳට බැදගන්න. මේ ටික බැදීගෙන එනකොට කැරට්, ලොකු ළූණු සහ කපාගත් රතු මිරිස් හෝ බෙල් පෙපර් ටිකත් එකතු කරලා හොඳට කලවම් කරගන්න.

දැන් පෑන් එකේ මැදින් පොඩියට ඉඩක් හදාගෙන ගසාගත් බිත්තර දෙක එකතු කරලා ස්ක්‍රැම්බල් කරගෙන අනිත් දේවල් එක්ක ආයෙම කලවම් කර ගන්න. ඊළඟට හීනියට කපාගත් ගෝවා එකතු කරලා තව ටික වේලාවක් බැදගන්න. දැන් චිලි පේස්ට් චිලි පේස්ට් එකතු කරගෙන හොඳට කවලම් කරලා බත් ටික එකතු කර ගන්න. හැන්දෙන් ගොඩක් පොඩි කර ගන්නෙ නැතුව බත් මිශ්‍ර කරමින් විනාඩි පහක් විතර බැදගන්න.

අන්තිමට රස අනුව සෝයා සෝස්, ෆිෂ් සෝස්, ලුණු සහ ගම්මිරිස් කුඩු එක්කර රස බලන්න. කැමති නම් සීනි ස්වල්පයක් එකතු කරන්නත් පුළුවන්. දැන් ලිප ඕෆ් කරලා ළූණු කොළ ටික එකතු කරලා හොඳට කවලම් කරන්න. සාමාන්‍යයෙන් නාසිගුරාන් එක බැදගත්ත බිත්තරයක් එක්ක පිළිගන්වනවා. මේකට බැදගත් ඉස්සන්, චිකන් හෝ අන්නාසි, තක්කාලි, පිපිඤ්ඤා පෙති එකතු කරගෙන සරසගන්නත් පුළුවන්.