Prawn Fried Rice කටට සැරට ඉස්සෝ ෆ්‍රයිඩ් රයිස්

Prawn Fried Rice – ඉස්සෝ ෆ්‍රයිඩ් රයිස් කටට සැරට කන්න පුළුවන් රසවත් කෑමක්. උත්සව අවස්ථා වලටත් අපූරුයි. 

අවශ්‍ය ද්‍රව්‍ය

• බත් කෝප්ප 2

• ඉස්සන් 200g (සෝදා ලුණු, ගම්මිරිස් තවරා ගන්න)

• කැරට් කෝප්ප 1 (සිහින්ව ලියාගන්න)

• ලීක්ස් කෝප්ප භාගයක් (රවුමට කපාගන්න)

• සුදු ළුණු පේස්ට් මේස හැඳි 1

• ළුණු ගෙඩි 1 (පෙති කපාගන්න)

• බිත්තර 1 (බීට් කරගන්න)

• ලුණු ස්වල්පයක්

• ගම්මිරිස් කුඩු ස්වල්පයක්

• කෑලි මිරිස් තේ හැඳි 01

• පොල්තෙල්

සාදන අන්දම

සාස්පානක් ලිප තබා එයට තෙල් එක්කර ඉස්සන් හොඳින් බැදගන්න. බැදුන ඉස්සන් පිඟානකට ඉවත් කර, එම තෙල් සාස්පාටම සුදු ළුණු පේස්ට් එක් කරන්න. ඉන්පසු ළුණු ද එක්කර විනාඩියක් පමණ බැදගන්න. දැන් එයට බීට් කරන ලද බිත්තරය එක්කර සියල්ල හොඳින් මිශ්‍ර කරගන්න. කැරට්, ලුණු, ගම්මිරිස් සහ කෑලි මිරිස්ද එක් කර හොඳින් මිශ්‍රකරගනිමින් විනාඩි 2, 3ක් තෙම්පරාදු කරගන්න. මීළඟට ලීක්ස් එකතු කරන්න. ඉන්පසුව බත් එකතු කර හොඳින් හැඳි ගාමින් විනාඩි 5ක් පමණ මිශ්‍රකරගන්න. අවසානයේ බැදගත් ඉස්සන් මිශ්‍ර කර ළිපෙන් බා ගන්න.