ගෙදරදීම චිකන් ඩ්රම්ස්ටික්ස් හදාගමු – Chicken Drumsticks
චිකන් ඩ්රම්ස්ටික්ස් කියන්නෙ ලොකු කුඩා කවුරුත් කන්න කැමති කෑමක්. ගෙදරදිම ලේසියෙන් ඩ්රම්ස්ටික් හදන්න පුළුවන් වුණත් ගොඩක් අය මේක රෙස්ටුරන්ට් එකකින් ඕඩර් කරන්න පුරුදුවෙලා ඉන්නවා. ඒත් Air Fryer එක use කරලා ගෙදරදිම හදාගන්න පුළුවන් ඩ්රම්ස්ටික් රස වගේම ගුණෙනුත් ඉහළයි. මොකද Air Fryer එක පාවිචිචි කරලා හදනකොට ගොඩක් තෙල් අවශ්ය වෙන්නෙත් නැති නිසා. ඉතින් ලන්ච් එකට, ඩිනර් එකට, පාටි එකකට වගේ ඕනෙම වෙලාවක ලේසියෙන්ම චිකන් ඩ්රම්ස්ටික් හදාගන්නෙ කොහොමද කියල බලමු.
අවශ්ය ද්රව්ය
චිකන් ඩ්රම්ස්ටික්ස් 4ක්
ඔලිව් තෙල් /ඇවකාඩෝ තෙල් තේ හැඳි 2ක් 
දෙහි යුෂ තේ හැඳි 1ක්
ලුණු තේ හැඳි 1ක්
ගම්මිරිස් කුඩු තේ හැඳි 1/4ක්
පැප්රිකා තේ හැඳි 1/2ක්
සුදුළූනු කුඩු තේ හැඳි 1/2ක්
ළූණු කුඩු තේ හැඳි 1/4ක්
සාදන ආකාරය
භාජනයකට ඔලිව් තෙල්, දෙහි යුෂ, ලුණු, ගම්මිරිස් කුඩු, පැප්රිකා, සුදුළූණු කුඩු සහ ළූණු කුඩු දාලා මේ ඔක්කොම හොඳට මිශ්ර කර ගන්න. මිශ්රණය වියළි නම් තෙල් ටිකක් එකතු කර ගන්න. ඊට පස්සෙ paper towel එකක් අරන් ඩ්රම්ස්ටික්ස් ටික පිහදලා තෙත ගතිය අයින් කරගන්න. මෙහෙම කරාම කුළුබඩු ටික හොඳට අල්ලනව වගේම ගෝල්ඩන් කලර් එකක් ලැබෙනවා.
දැන් හදාගත්ත කුළුබඩු මිශ්රණය චිකන් කෑලිවල හොඳට තවරගෙන විනාඩි 15 සිට 30 ක් විතර මැරිනේට් කර ගන්න. (රැයක් පුරා ෆ්රිජ් එකේ තිබ්බොත් වඩාත් හොඳයි) ඊළඟට Air Fryer එක සෙල්සියස් අංශක 200 (ෆැරන්හයිට් 390) අගයට pre heat කරගෙන චිකන් කෑලි එකකට එකක් ගෑවෙන්නෙ නැති විදිහට Fryer basket එකේ තනි පේලියක තියලා විනාඩි 20ක් විතර cook කර ගන්න. මිනිත්තු කිහිපයකින් එක් වරක් පෙරළීමෙන් දෙපැත්තම එකවගේ ගෝල්ඩන් කලර් එකට ගන්න පුලුවන්. මිනිත්තු කිහිපයක් නිවෙන්න තියලා කෑමට ගන්න.
