South Indian Fish Curry – මෙම මාළු කරි එක දකුණු ඉන්දියාවට ආවේණික මෙන්ම ජනප්‍රිය කෑමක්. විනාඩි හතලිහකින් පමණ සකසා ගත හැකි මෙය බත්, රොටි, නාන් සමග කෑමට ගත හැකියි.
අවශ්‍ය ද්‍රව්‍ය
• මාළු ග්‍රෑම් 700g (සුදු පැහැ මාළු)
• ලුණු
• රතු ළූණු
• ඉඟුරු
• සුදුළූණු
• කරාබුනැටි
• අමු මිරිස්
• එළවළු තෙල් (මේස හැඳි 1)
• තක්කාලි සෝස් (300g)
• මිරිස් කුඩු (මේස හැඳි 1)
• කහකුඩු ස්වල්පයක්
• පොල්කිරි
• සියඹලා
• පොල් තෙල් ස්වල්පයක්
• අබ
• ලූණු කොළ 4 ක් 5 ක්
• කරපිංචා
සාදන ආකාරය
මාළු හොඳින් සෝදා කපාගෙන ලුණු මිශ්‍ර කරගන්න(සීසන් කිරීමට). රතුළූණු, ඉඟුරු, සුදුළූණු සහ අමුමිරිස් බ්ලෙන්ඩර් කර පේස්ට් එකක් සාදාගන්න. බඳුනක් ලිප තබා එයට එළවළු තෙල් එක්කොට පේස්ට් එක විනාඩියක් පමණ බැදගන්න. ඉන්පසු මිරිස් කුඩු සහ කහ ස්වල්පයක් මිශ්‍ර කරන්න. මෙයටම තක්කාලි සෝස් එක්කර මිනිත්තු කිහිපයක් පිසගන්න. මිශ්‍රණයට පොල් කිරි එකතු කරන්න. පේස්ට් එක, තක්කාලි සෝස් සහ පොල් කිරි ඇතුළත් මිශ්‍රණය හොඳින් කළවම් කරගනිමින් ක්‍රීම් ගතියක් එනතුරු පිසගන්න. ඉන්පසු සියඹලා එක් කරගන්න. අවසානයේ මාළු එක් කර මද ගින්නේ විනාඩි 7 – 10 ක් පමණ පිසගන්න. බැදගත් අබ, කරපිංචා සහ ළූණු කොළ, මාළු කරිය මත ඉස පිළිගන්වන්න.
