තේ මේසෙට හොඳම කෑමක් පොල් කේක්

තේ මේසෙට හොඳම කෑමක් පොල් කේක්

තේ මේසෙට තියන්න හොඳම කෑමක් තමයි පොල් කේක්. ලංකාවෙ රසට, නිවැරදිව පොල් කේක් එකක් හදාගන්නෙ කොහොමද බලමු. ගෙදරදිම හදාගන්න නිසා නියම රසට වගේම පිරිසිඳුවට කන්නත් පුළුවන්. 

අවශ්‍ය ද්‍රව්‍ය

• සිහින්ව ගාගත් පොල් 250g

• කිතුල් පැණි 340ml

• පාන් පිටි 150g 

• බිත්තර 03

• කුඩු කරගත් කරාබු නැටි, කරදමුංගු, කුරුදු මිශ්‍රණයෙන් තේ හැඳි 01

• බේකින් පව්ඩර් තේ හැඳි 01

• කපා ගත් රට ඉදි 100g

• කපා ගත් කජු 100g

• වියළි මිදි 50g

• වැනිලා තේ හැඳි 01

• ලුණු තේ හැඳි 01

සාදන ක්‍රමය

• කිතුල් පැණි ටික පෑන් එකකට දමා මද ගින්දරේ රත් කර ගන්න. පැණිටික ඔක්කොම දාන්නෙ නැතිව ටිකක් ඉතුරු කර ගන්න. (කිතුල් පැණි වෙනුවට පොල් පැණි, සීනි, හකුරු එහෙමත් අර ගන්න පුළුවන්.) දැන් එයට කුඩු කරගත් කරදමුංගු මිශ්‍රණය සහ ලුණු එකතු කරන්න. ඊළඟට පොල් ටික දාලා හොඳට කවලම් කර ගන්න. පොල් පැණි ටික තෙත ගතිය තියෙද්දී ලිපෙන් බා ගන්න.

• මීළඟට බිත්තර ටික බීට් කර ගන්න. පිටි ටික බේකින් පව්ඩර් ටිකත් එක්ක කවලම් කර ගන්න. දැන් පොල් පැණි ටික හොඳට නිමුනාට පසු එයට බීට් කර ගත් බිත්තර ටික එකතු කරගෙන එයට පිටි ටිකත් එකතු කරලා කවලම් කර ගන්න. ඊට පස්සෙ කජු, රට ඉඳි, වියළි මිදි සහ වැනිලා ටික එකතු කර හොඳට කවලම් කර ගන්න. කේක් තැටියක දමා අවන් එකේ 180°C ක උෂ්ණත්වයක විනාඩි 45ක් පමණ බේක් කර ගන්න. කේක් එක බේක් වෙලා ඉවර උනාට පස්සේ අවන් එකෙන් එලියට අරගෙන ඉතුරු කර ගත්පැණි ටික කේක් එක උඩින් ගාන්න. නිවුණ පසු කැබලිවලට කපා ගන්න.