Tofu Curry නිර්මාංශ අයට මස් වගේ කෑමක්
නිර්මාංශ අයට කන්න පුළුවන්, මස්වලට සමාන ටෝෆු ගොඩක් රටවල මස් වෙනුවට ආදේශකයක් විදිහට කන කෑමක්. සෝයා කිරි වලින් හදන ටෝෆු පෝෂණ ගුණයෙනුත් ඉහළයි. කැල්සියම්, යකඩ, මැග්නීසියම්, ඛනිජ ලවණ වගේ පෝෂ්ය පදාර්ථ අඩංගු වෙනවා. හදවත් රෝග අවදානම අඩු කරන්නත්, රක්තහීනතාවය වැළැක්වීමටත්, දත් සහ අස්ථි ශක්තිමත් කිරීමටත් අවශ්ය පෝෂ්ය පදාර්ථ වලින් පිරිපුන් ටෝෆු, චීනයෙන් ඇරඹිලා මේ වෙනකොට ලොව පුරාම ජනප්රිය කෑමක් බවට පත්වෙලා තියෙනවා. ටෝෆු කරි බත්, නූඩ්ල්ස්, රොටිත් එක්ක කෑමට ගන්න පුළුවන්. ලංකාවෙ අපේ රහට ටෝෆු කරියක් හදාගන්නෙ කොහොමද බලමු.
• අවශ්ය ද්රව්ය
ටෝෆු 150g
ඉඟුරු පේස්ට් තේ හැඳි 1
සුදු ළූණු පේස්ට් තේ හැඳි 1
සිහින්ව කැපූ රතු ළූණු ගෙඩි 5 – 6 ක්
අමුමිරිස් කරල් 2 – 3 ක්
රම්පෙ
කරපිංචා
කුරුඳු පොතු කැබැල්ලක්
එනසාල් ස්වල්පයක්
කරාබුනැටි 2-3
මිරිස්කුඩු ස්වල්පයක්
බැදපු තුනපහ කුඩු තේ හැඳි 02 
කහකුඩු තේ හැඳි ½
උළුහාල් ස්වල්පයක්
අබ ස්වල්පයක්
ලුණු
යෝගට් මේස හැඳි 2 ක්
මිටිකිරි කෝප්ප බාගයක්
තක්කාලි ගෙඩි 02 ක්
පොල් තෙල්
• සාදන ආකාරය
ටෝෆු කෑලිවලට කපාගෙන ලුණු සහ ගම්මිරිස් දමා තම්බාගන්න. ඉන් පසු වතුර ගතිය නැති වෙනතුරු මිරිකා හරින්න. තෙල් රත් වෙන්නට හැර එයට අබ ටික එකතු කරන්න. ඉන් පසු ඉඟුරු, සුදු ළූණු , එනසාල්, කරාබු නැටි, රම්පෙ, කරපිංචා, රතු ළූණු සහ අමු මිරිස් එකතු කර විනාඩි දෙක තුනක් තෙම්පරාදු කර ගන්න. දැන් මෙයට ටෝෆු එකතු කරන්න. ඊළඟට මිරිස් කුඩු, තුනපහ කුඩු සහ කහ කුඩු එකතු කරන්න. ඊළඟට යෝගට්, තක්කාලි, මිටිකිරි සහ රස අනුව ලුණු එකතු කරන්න. පොල් කිරි ටික හිඳීගෙන එනවිට ලිපෙන් ඉවත් කර ගන්න.
