අපි ආසම කඩචෝරුවක් – ඉස්සෝ වඩේ

අපි ආසම කඩචෝරුවක් – ඉස්සෝ වඩේ

ඉස්සෝ වඩේ කියන්නෙ ලොකු කුඩා කවුරුත් ආස snack එකක් නැත්තම් කඩචෝරුවක්. අපේ රටේ ජනප්‍රියම street food එකක් තමයි ඉස්සො වඩේ. කොච්චර කෑවත් එපා වෙන්නෙ නැති මේවා, රස වගේම ගුණ කෑමක්. ඉස්සො වඩේවල ප්‍රෝටීන්, මේදය එහෙම බහුලයි. හවස තේ වෙලාවට ගැළපෙනම දෙයක් තමයි මේ. පිරිසිඳුව, රසට ගෙදරදීම පහසුවෙන් ඉස්සො වඩේ හදාගන්නෙ කොහොමද කියලා බලමු. 

අවශ්‍ය ද්‍රව්‍ය :

ඉස්සන් 150g

කඩල පරිප්පු කෝප්ප 1 1/2

ඉඟුරු පේස්ට් මේසහැඳි 1 ක්   

රතු ලූණු ගෙඩි 6 ක්

වියලි මිරිස් කරල් 12 ක් 

සුදුලූණු බික් කිහිපයක්

කරපිංචා

කහ කුඩු තේහැඳි 1

මිරිස් කුඩු තේහැඳි 2

ලුණු රස අනුව

දෙහි යුෂ තේ හැඳි 1

පාන් පිටි මේසහැඳි 3

පොල් තෙල්

• වඩේ එක උඩ ඇතිරීමට

රවුමට කපා ගත් ලොකු ලූණු ගෙඩියක්

කපා ගත් අමු මිරිස් කරල් 4

පොත්ත සුද්ද නොකල ඉස්සන්

• සාදන ක්‍රමය

කඩල පරිප්පු වතුරේ දමා පැය තුනක් පමණ තියෙන්නට හැර, වතුර බේරා පිටි කර ගන්න. ඉස්සන් ටික සුද්ද කරගෙන එයට දෙහි බෑයක යුෂ සහ කහ කුඩු ස්වල්ප‍යක් එකතු කර අත ගා ගන්න. මීළඟට පිටිකර ගත් පරිප්පු වලට ඉඟුරු පේස්ට්, සුදුලූණු, රතුලූණු, වියළි මිරිස් කරල්, කරපිංචා සහ ඉස්සන් 6ක් එකතු කර හොඳට කොටා ගන්න. මීළඟට මිශ්‍රණය භාජනයකට දමා එයට ලුණු, පාන් පිටි සහ මිරිස් කුඩු එකතු කර හොඳින් කවලම් කර ගන්න.

දැන් අත්ලේ වතුර තවරාගෙන අවශ්‍ය ප්‍රමාණයෙන් පරිප්පු මිශ්‍රණය බෝල සාදා පැතලි හැඩයට හදා ගන්න. මීළඟට ඒවා මත පොත්ත සුද්ද නොකෙරූ ඉස්සන් එක බැගින් තබා තරමක් තද කර ගන්න. (කැමතිනම් පාන්පිටි ටිකකට වතුර ටිකක් එකතු කර මිශ්‍රණයක් හදා එය වඩේ එක මත ආලේප කර ඒ මත ඉස්සන් රඳවා ගන්නත් පුළුවන්) දැන්, බඳුනකට පොල්තෙල් එකතු කර රන්වන් පැහැයට හැරෙන තුරු ඉස්සො වඩේ බැද ගන්න. කපා ගත් ලූණු සහ අමු මිරිස් වඩේ එක උඩින් දමා ගන්න. උණු උණුවේම රස විඳින්න!