Robbery – පෞද්ගලික ආයතනයක ඉහළ පෙලේ පරිපාලන නිලධාරියෙකු අනියම් ඇසුරකට පොළඹවා ගෙන ඔහුගේ නිවසේ තිබූ රුපියල් ලක්ෂ දහයකට ආසන්න වටිනාකමකින් යුත් භාණ්ඩ සොරකම් කළ බවට සැකපිට තරුණියක අත්අඩංගුවට ගෙන තිබේ. පානදුර, පින්වත්ත ප්‍රදේශයේ පදිංචි 41 හැවිරිදි අදාළ විවාහක නිලධාරියා සිදු කළ පැමිණිල්ලකට අනුව සැකකාරිය අත්අඩංගුවට ගත් බව පොලීසිය පවසයි.
මෙලෙස අත්අඩංගුවට ගෙන ඇත්තේ, හම්බන්තොට, සිරිබෝපුර ප්‍රදේශයේ පදිංචි 26 හැවිරිදි තරුණියක් වන අතර ඇය මෙම පරිපාලන නිලධාරියා හඳුනාගෙන ඇත්තේ කොළඹ රාත්‍රී සමාජ ශාලාවකදී බවත් ඉන්පසු ඔහු ඇයව විවාහ කර ගැනීමට තීරණය කර සිය බිරිඳ මගහැර නිතර නිවසට කැඳවාගෙන විත් තිබෙන බව පොලිස් ප්‍රශ්න කිරීම් වලදී හෙළිව තිබේ. අයිස් මත්ද්‍රව්‍ය වලට ඇබ්බැහිව සිට ඇතැයි කියන සැකකාරිය තවත් තරුණයෙකු සමග එක්ව මෙම පරිපාලන නිලධාරියා නිවසේ නොමැති අවස්ථාවක ඔහුගේ නිවසට ඇතුළු වී නිවසේ තිබූ නවීන ලැප්ටොප් පරිගණකයක්, අගල් 55 රූපවාහිනි යන්ත්‍රයක්, වටිනා අත් ඔරලෝසු, විදුලි ස්ත්‍රික්කයක් ඇතුළු මුළුතැන්ගෙයි උපකරණ සොරාගෙන ගොස් ඇති බව පොලිසිය වැඩිදුරටත් පවසා සිටී.
