Call Me By Your Name – ජීවයෙන් පිරුණ රන් පැහැ හිරු කිරණින් පරිසරය නහවමින් උදා වී තිබුණේ ගිම්හාන සෘතුව යි. දිලිසෙන කොළ පැහැති ගස්වැල් මත රත් පැහැයෙන් දිදුලන ඇපල්, පීච් වැනි ඵල හටගෙන තිබුණා. අතිශය නැවුම් ඒ පලතුරු රසයෙන් බොහොම මිහිරි යි. වරක් රසවින්ද හොත් ඒ රසයෙන් ඔබට ගැලවී යා නොහැකියි. අමතක කළ නොහැකියි. ඇබ්බැහි වෙන සුළුයි. ප්‍රේමයද එවැනියි.
ඒ ගෙවීයමින් පැවතුණේ 1983 වර්ෂය. සුන්දර ඉතාලියේ පුංචි ගම්මානයක්. කතා නායකයා Elio. ඔහු තවමත් දහ හත් හැවිරිදියි. ඒ මුහුණ ප්‍රතිමාවක මුහුණ තරම් කලාත්මකයි. තමන්ගෙ පවුලෙ අයත් එක්ක ජීවත්වුන මේ හීන්දෑරි ගැටවරයා බොහෝ සේ පොත් කියෙව්වා. සංගීතයට පෙම් කළා. ළමාවියට සමුදී සුන්දර යොවුන් වියට පිවිසීමේ ආශාවෙන් සහ කුතුහලයෙන් පසු වුණා. විසිහතර හැවිරිදි අමෙරිකානු කොල්ලෙකු වූ Oliver, Elio ගේ නිවහනට පැමිණෙන්නේ Elio ගේ පවුලේ අය සමග විවේකයෙන් දිනගත කිරීමේ අරමුණෙන්. කඩවසම්කමේ සංකේතයක් බඳුවූ මේ අමෙරිකානුවා Elio ගේ සිත සසල කරන්නට සමත්ව තිබුණා. අවුරුදු දහ හතක කොල්ලෙකුට ඒ හැඟීම නුහුරු එකක්. ප්‍රහේලිකාවක්. අනික ඔහු පිරිමියෙක්.
පොත් කියවමින්,පියානෝ වාදනය කරමින් Oliver හා එක්ව බයිසිකල් පදිමින්, සංචාරය කරමින් Elio ගේ දවස් ගතව ගියා. ඔහු හා එක්ව ගත කරන නිමේෂයන් ජීවයෙන් පිරී ඉතිරී ගොස් ඇතිවග Elio ට දැනුණා. තම සිතේ පිරුණු , නොඉවසිලිමත් හැඟීම් Oliver ට පවසන්නට Elio ට වූවමනා වුණා. ඔහුව සිපගන්න. තමා ඔහුට ආදරේ වග පවසන්න. හිරු රැසින් නෑවුන බොහොම නිස්කලංක වටපිටාවක තුරු ගොමුවකදී පීච් ඵලයකටත් වඩා මිහිරි ඔවුන්ගේ පළමු සිපගැනීම සිදුවුණා.
ඉතින් ඊට පස්සෙ..?
Call Me by Your Name මොහොතකට මේ ලෝකෙම අමතක කරලා දමලා සැනසෙන්න පුළුවන් සොඳුරු සිනමාපටයක්. සිත සැනසිල්ලෙන් පුරවා දමන බොහොම සොඳුරු ඉතාලි ගම්මානයකට ඔබව රැගෙන යෑමක්. පිරිමි දෙන්නෙක් අතර ප්‍රේමය මොන වගේද…? Elio සහ Oliver අතර බැඳීම බොහොම සුන්දරයි. බොළඳයි. ශෘංගාරයෙන් පිරුණු ඒ බැඳීම සැබැවින්ම සෙනෙහෙබරයි. ඒත් මේ ළයාන්විත හැඟීම්වලට, බොහොමයක් ආටෝප ප්‍රදර්ශනයන්ගෙන් සහ ආත්ම වංචාවන්ගෙන් සමන්විත වූ පියවි ලෝකය තුළ දී ඉඩක් තිබෙනවාද…? පියවි ලෝකය තුළ දී අපිට සිද්ධවෙනවා අපේ ප්‍රකෘති හැඟීම්වලට අගුළු දමාගන්නට. යම් දිනෙක අපිට සිදුවෙනවා අපි කෙතරම් කැමති ප්‍රේමයකට වුවත් සමුදෙමින් යථාර්ථය වැළඳගන්නට. කවියක් තරමටම සොඳුරු මේ සිනමාපටය ඔබට පසක් කර දෙන්නේ ඒ යථාර්ථයයි.
