රේගුව ඩිජිටල්කරණයට
ජනාධිපති කාර්යාලයේ ආදායම් පරිපාලන ප්‍රතිසංස්කරණ හා නවීකරණ කාර්යාංශය සහ ශ්‍රී ලංකා රේගුව එක්ව හඳුන්වා දෙන “කඩදාසි රහිත රේගු ප්‍රකාශන ක්‍රමවේදය” ඔක්තෝබර් මස 1 වනදා සිට ක්‍රියාවට නැංවේ. රජයේ ආර්ථික ප්‍රතිසංස්කරණ සහ රාජ්‍ය සේවා නවීකරණ වැඩපිළිවෙළ යටතේ රාජ්‍ය සේවාවන් ඩිජිටල්කරණය කිරීමේ පියවරක් ලෙස ඇරඹෙන මෙමගින් කඩදාසි රහිත ක්‍රමවේදය හරහා රේගු නිශ්කාෂණ ක්‍රියාවලිය වඩාත් කාර්යක්ෂමව මෙන්ම වේගවත්ව සහ විනිවිදභාවයෙන් යුතුව ඉටු කිරීමට හැකියාව ලැබෙනු ඇත.
ඒ අනුව, මෙම මස 01 වනදා සිට ක්‍රියාත්මක වන පරිදි සියලුම ආනයනකරුවන් සහ ප්‍රකාශකයන් විසින් සිය රේගු ප්‍රකාශන සහ අදාළ ලිපිගොනු වලංගු ඩිජිටල් අත්සන සහිතව යොමු කිරීම අනිවාර්ය වන අතර පැරැණි ක්‍රමවේදයට අනුව යොමු කරනු ලබන රේගු ප්‍රකාශන භාර ගැනීම තවදුරටත් සිදු නොකෙරේ. ඩිජිටල් අත්සන තැබීමෙන් පසුව සිදු කරනු ලබන යම් වෙනස්කම් ඇත්නම් ඒවා මෙම පද්ධතිය මගින් පහසුවෙන් හඳුනා ගනු ලබන බැවින්, වංචා සහ දූෂණ සඳහා ඇති ඉඩකඩ අවම වීම මෙම නව ක්‍රමවේදයේ විශේෂත්වයකි.
✍️ ධාරා අබේනායක විසිනි.
