MP Seat – හදිසි රිය අනතුරකින් ජීවිතක්ෂයට පත්වූ රාජ්ය අමාත්ය සනත් නිශාන්තගේ මන්ත්රී පුරප්පාඩුවට, ශ්රී ලංකා පොදු ජනපෙරමුණේ පුත්තලම දිස්ත්රික් ලැයිස්තුවේ මීළඟට සිටින අපේක්ෂකයා වන එල්.කේ. ජගත් ප්රියංකර පත් කරමින් ගැසට් නිවේදනයක් නිකුත් කර තිබේ. මන්ත්රී ධූරයක් පුරප්පාඩු වී ඇති බවට පාර්ලිමේන්තු මහ ලේකම්වරයා විසින් මැතිවරණ කොමිෂන් සභාව වෙත සිදු කරන ලද දැනුම්දීමෙන් අනතුරුව මෙම තෝරාපත් කිරීම සිදු කළ බව අදාළ ගැසට් නිවේදනයේ සඳහන්.
2020 වසරේ පැවති පාර්ලිමේන්තු මැතිවරණයේදී පුත්තලම දිස්ත්රික්කයෙන් ශ්රී ලංකා පොදුජන පෙරමුණට මන්ත්රී ආසන 5ක් හිමිවූ අතර මනාප ලැයිස්තුවේ ප්රථමයා වූයේ අභාවප්රාප්ත සනත් නිශාන්තය. එල්.කේ ජගත් ප්රියංකර මනාප ඡන්ද 40,527ක් හිමි කර ගෙන මනාප ලැයිස්තුවේ 6වන ස්ථානයේ පසුවිය. ඔහු විමල් වීරවංශගේ නායකත්වයෙන් යුත් ජාතික නිදහස් පෙරමුණේ පුත්තලම දිස්ත්රික් නායකයා ලෙසද කටයුතු කරයි. ඔහු එම මන්ත්රී ධූරයේ දිවුරුම් දීම ලබන මස 8 වැනිදා සිදු කිරීමට නියමිත බව දේශපාලන ආරංචි මාර්ග සඳහන් කරයි.
