සමාජ මාධ්‍ය තුළ දරුවන් අනිසි ලෙස යොදාගැනීමට එරෙහිව නීති
දරුවන් අවදානම් සහිත ස්ථානවලට රැගෙන යාම, අසභ්‍ය වචන භාවිත කරවීම, වැඩිහිටියන්ට පමණක් සුදුසු අන්තර්ගතයන් සඳහා යොදාගැනීම සහ දරුවන් ලිංගික වශයෙන් නිරාවරණය වන අන්තර්ගතයන් නිර්මාණය කිරීම වැනි ක්‍රියාකාරකම් සමාජ මාධ්‍ය තුළ දක්නට ලැබෙන බව කාන්තා සහ ළමා කටයුතු අමාත්‍ය සරෝජා සාවිත්‍රි පෝල්රාජ් පෙන්වා දෙයි. සමාජ මාධ්‍ය තුළ ජනප්‍රියත්වය සහ මුදල් ඉපයීමේ අරමුණින් දරුවන් අනතුරුදායක ක්‍රියාකාරකම් සඳහා යොදාගැනීම වැළැක්වීමට නව නීති රීති හඳුන්වාදීමට පියවර ගන්නා බව අමාත්‍යවරිය සඳහන් කළාය.
සමාජ මාධ්‍ය තුළ ජනප්‍රියත්වය හෝ ආදායම අපේක්ෂාවෙන් දරුවන්ගේ ආරක්ෂාව සහ පෞද්ගලිකත්වය අවදානමට ලක් කිරීම බරපතළ ගැටලුවක් බව අවධාරණය කළ ඇය දරුවෙකුගේ පෞද්ගලිකත්වය අවදානමට ලක් කිරීමට දෙමව්පියන්ට පවා අයිතියක් නොමැති බවත් දරුවෙකු සමාජ මාධ්‍ය තුළ ජනප්‍රිය පුද්ගලයෙකු බවට පත්වීම පිළිබඳ තීරණය ඔහුගේ හෝ ඇයගේ වයස සහ පරිණතභාවය අනුව ගත යුතු පෞද්ගලික තීරණයක් බව ද ප්‍රකාශ කළාය. දෙමව්පියන්ගේ වගකීම් විරහිත සමාජ මාධ්‍ය භාවිතය හේතුවෙන් දරුවන්ගේ ආරක්ෂාව බරපතළ ලෙස අවදානමට ලක්වන්නේ නම්, එම දරුවන්ගේ සුබසාධනය වෙනුවෙන් ආරක්ෂිත භාරකාරත්වයන් යටතට පත් කිරීම වැනි පියවර ගැනීමට ද සිදුවිය හැකි බව අමාත්‍යවරිය වැඩිදුරටත් සඳහන් කළාය.
මේ අතර, දරුවන්ට හිතකර මාධ්‍ය සංස්කෘතියක් ගොඩනැගීමේ අරමුණින් විශේෂඥ මණ්ඩලයක් මගින් මාර්ගෝපදේශ සංග්‍රහයක් සකස් කිරීමට කාන්තා සහ ළමා කටයුතු අමාත්‍යාංශය සහ ජාතික ළමා ආරක්ෂක අධිකාරිය එක්ව කටයුතු කර තිබේ. එම මාර්ගෝපදේශ සංග්‍රහය සකස් කිරීමේ කටයුතු මේ වන විට අවසන් අදියරේ පවතින අතර, ඉදිරියේදී එය ක්‍රියාත්මක කිරීමට නියමිත බව සඳහන් වේ. සමාජ මාධ්‍ය තුළ දරුවන් වාණිජමය අරමුණු හෝ ජනප්‍රියත්වය වෙනුවෙන් යොදාගැනීම හෙවත් ‘Kidfluencing’ පාලනය කිරීම සඳහා ප්‍රංශය සහ අමෙරිකාවේ කැලිෆෝනියා ප්‍රාන්තය ඇතුළු විවිධ ප්‍රදේශවල ද නීතිමය පියවර ගෙන තිබේ. ඒ අතර, දරුවන් සමාජ මාධ්‍ය ඔස්සේ උපයන ආදායමෙන් කොටසක් ඔවුන්ගේ අනාගතය වෙනුවෙන් සුරක්ෂිත කිරීම සහ එවැනි කටයුතු සඳහා දරුවන් යොදාගත හැකි කාලය සීමා කිරීම ද ඇතුළත් වේ.
මෙවැනි ජාත්‍යන්තර ප්‍රවණතා සැලකිල්ලට ගනිමින්, ශ්‍රී ලංකාව තුළ ද සමාජ මාධ්‍ය භාවිතයේදී දරුවන්ගේ ආරක්ෂාව, පෞද්ගලිකත්වය සහ සුබසාධනය තහවුරු කිරීම සඳහා නව නීතිමය සහ මාර්ගෝපදේශමය රාමුවක් හඳුන්වා දීමට අපේක්ෂා කෙරේ.
