Cricket ban- ජාත්‍යන්තර ක්‍රිකට් කවුන්සිලය ශ්‍රී ලංකා ක්‍රිකට් සාමාජිකත්වය අත්හිටුවමින් පනවා ඇති තහනම පෙබරවාරි 15 වැනිදාට පෙර ඉවත් කිරීමට හැකිවනු ඇතැයි තමන් විශ්වාස කරන බව සංචාරක හා ඉඩම්, ක්‍රීඩා හා යෞවන කටයුතු අමාත්‍ය හරීන් ප්‍රනාන්දු මහතා අද (11) පස්වරුවේ පැවසීය.
මේ දිනවල ශ්‍රී ලංකාවේ සංචාරයක නිරත වන ජාත්‍යන්තර ක්‍රිකට් කවුන්සිලයේ ප්‍රධාන විධායක නිලධාරී ජෙෆ් ඇලඩිස් මහතා සමඟ පැවති සාකච්ඡාවේදී ඔහු එවැනි ඉඟියක් කළ බවත් ICC මීළඟ විධායක කමිටු රැස්වීම ලබන මාර්තු මාසයේදී පැවැත්වීමට නියමිත බැවින් ශ්‍රී ලංකාවේ තහනම ඉවත් කිරීම සඳහා වීඩියෝ තාක්ෂනය ඔස්සේ විශේෂ විධායක සභාවක් පවත්වන බවද අමාත්‍යවරයා සඳහන් කළේය.
ශ්‍රී ලංකා ක්‍රිකට් ක්‍රීඩාවට පනවා ඇති තහනම පෙබරවාරි 15 වැනිදාට පෙර ඉවත් නොකළහොත් ලබන ජුනි මස ශ්‍රී ලංකාවේ පැවැත්වීමට නියමිත ජාත්‍යන්තර ක්‍රිකට් කවුන්සිලයේ වාර්ෂික සමුළුව ශ්‍රී ලංකාවට අහිමි වන බවත් එසේ වුවහොත් එය විශාල පාඩුවක් බවත් අමාත්‍ය හරීන් ප්‍රනාන්දු මහතා වැඩිදුරටත් සඳහන් කළේය.
