Former Minister – තමන්ව අපේක්ෂිත ඇප මත මුදා හැරීම ප්රතික්ෂේප කරමින් කොළඹ මහේස්ත්රාත් අධිකරණය විසින් දී තිබෙන නියෝගය ප්රතිශෝධනය කර, තමන්ව ඇප මත මුදා හරින ලෙස ඉල්ලා හිටපු අමාත්ය රාජිත සේනාරත්න විසින් ඉදිරිපත් කර තිබෙන පෙත්සම සලකා බැලීම සඳහා ලබන 30 වැනිදා කැඳවන ලෙස කොළඹ මහාධිකරණය විසින් නියෝග කර තිබෙනවා.
මෙම පෙත්සම අද මහාධිකරණ විනිසුරු ඉන්ද්රිකා කාලිංගවංශ ඉදිරියේ කැඳවනු ලැබූ අවස්ථාවේදී, ඇප ප්රතික්ෂේප කිරීමට අදාළ මහේස්ත්රාත් අධිකරණයේ තීන්දුවේ පිටපත මහාධිකරණය හමුවේ ඉදිරිපත් කර නොමැති බැවින්, මෙම පෙත්සම සම්බන්ධයෙන් තමන්ට නියෝගයක් නිකුත් කළ නොහැකි බව විනිසුරුවරිය පෙන්වා දී තිබෙනවා.
ඒ අනුව, අදාළ ඇප තීන්දුවේ පිටපතක් ඉදිරිපත් කිරීමෙන් පසු මේ සම්බන්ධයෙන් කරුණු දක්වන ලෙසයි මහාධිකරණ විනිසුරුවරිය හිටපු අමාත්ය රාජිත සේනාරත්න වෙනුවෙන් පෙනී සිටි ජනාධිපති නීතිඥ මෛත්රී ගුණරත්න වෙත දැනුම් දුන්නේ.
