Ranil Wickramasinghe 2024 ජනවාරි මස 1 වන දින සිට ක්‍රියාත්මක වන පරිදි අමාත්‍යංශ 10ක් සඳහා නව අමාත්‍යංශ ලේකම්වරුන් දස දෙනෙකු සහ පළාත් 2ක් සඳහා ප්‍රධාන ලේකම්වරුන් දෙදෙනෙකු මිට සුළු මොහොතකට පෙර ජනාධිපති රනිල් වික්‍රමසිංහ විසින් පත්කර ඇති බව ජනාධිපති මාධ්‍ය අංශය නිවේදනය කරයි.
නව පත්වීම් වලට අනුව, ජල සම්පාදන හා වතු යටිතල පහසුකම් අමාත්‍යංශ ලේකම් ධූරයට ඒ. සී. මොහොමඩ් නෆීල් ද, රාජ්‍ය පරිපාලන, ස්වදේශ කටයුතු, පළාත් සභා හා පළාත් පලන අමාත්‍යංශ ලේකම් ධූරයට ඩබ්. පී. පී. යසරත්න ද, වාරිමාර්ග අමාත්‍යංශ ලේකම් ධූරයට සමන් දර්ශන පාඬිකෝරාල ද පත් කර ඇති අතර අධ්‍යාපන අමාත්‍යංශයේ ලේකම් ධූරයට වසන්තා පෙරේරා ද, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යංශයේ ලේකම් ධූරයට එන්. එම්. රණසිංහ ද, වනජීවී හා වන සම්පත් සංරක්ෂණ අමාත්‍යංශයේ ලේකම් ධූරයට ගුණදාස සමරසිංහ ද පත් කර තිබේ. තවද, පරිසර අමාත්‍යංශයේ ලේකම් ධූරයට බී. කේ. පී. චන්ද්‍රකීර්ති ද, විදුලි බල හා බලශක්ති අමාත්‍යංශයේ ලේකම් ධූරයට ආචාර්ය සුලක්ෂණ ජයවර්ධන ද, ප්‍රවාහන හා මහාමාර්ග අමාත්‍යංශයේ ලේකම් ධූරයට රංජිත් රූබසිංහ ද, තාක්ෂණ අමාත්‍යංශයේ ලේකම් ධූරයට ධර්මශ්‍රී කුමාරතුංග ද පත් කර ඇත.
ජනාධිපති මාධ්‍ය අංශය සඳහන් කරන ආකාරයට, ජනාධිපති රනිල් වික්‍රමසිංහ විසින් උතුරු මැද පළාත් ප්‍රධාන ලේකම් ලෙස ආර්. එම්. ඩබ්. එස්. සමරදිවාකර ද, බස්නාහිර පළාත් ප්‍රධාන ලේකම් ලෙස එස්. එල්. ඩී. කේ. විජයසිංහ ද පත් කරනු ලැබ තිබේ.
Image Source: President Media division
