Morocco earthquake පසුගිය බ්‍රහස්පතින්දා රාත්‍රියේ මොරොක්කෝව තුළ සිදුවූ භූමිකම්පාවෙන් තවමත් සුන්බුන් යට සිරවී සිටින අය බේරා ගැනීමට දැඩි පරිශ්‍රමයක් දැරීමට සිදුව ඇතැයි වාර්තා වනවා. ජීවිතාරක්ෂක කණ්ඩායම් වලට එම ස්ථාන වෙත යන්ත්‍ර සූත්‍ර රැගෙන යෑම දුෂ්කර හෙයින් ගැමියන් දිවි ගලවා ගත් අය සොයා ගැනීම සඳහා අතින් හා සවල් මඟින් සුන්බුන් හාරමින් සිටිනු දක්නට ලැබෙන බව BBC පුවත් සේවය වාර්තා කරයි. එහෙත්, දරුණුතම බලපෑමට ලක් වූ ප්‍රදේශ සමහරක් ඉතා දුරින් පිහිටා ඇති හෙයින් භූමිකම්පාවෙන් පසු දින කිහිපයක් ගතවුවද ඒ පෙදෙස් වලට ළඟා වීමට නොහැකි වී තිබෙන අතර තුවාල ලැබූ හා සුන්බුන් අතර සිරවූ බොහෝ දෙනෙකුට වඩාත්ම තීරණාත්මක කාල පරිච්ඡේදය මෙය බව මොරොක්කෝ සහන සේවා නිලධාරීන්ගේ අදහසයි.
දරුණු ලෙස බලපෑමට ලක් වූ බොහෝ ප්‍රදේශ පිහිටා ඇති හයි ඇට්ලස් කඳුකරයට යන මාර්ගය පස් කඳු කඩා වැටීමෙන් අවහිර වී තිබෙනවා. ප්‍රාදේශීය රෝහල් හිස්ව ගොස් ඇත්තේ ඒවාට ඇතුළු වීම අනාරක්ෂිත නිසාය. ඒ වෙනුවට රෝගීන්ට ප්‍රතිකාර කරනු ලබන්නේ රෝහල් භූමිය තුල තනා ඇති තාවකාලික කූඩාරම් වලය. රෝහල් අවට වීදි විනාශ වූ ගොඩනැගිලිවල සුන්බුන්, අධික වාහන තදබදය සහ භූමිකම්පාවෙන් සියල්ල අහිමි වූවන්ගෙන් පිරී ඇත. නිවාස අහිමි වූ මිනිසුන් සඳහා මාර්ග දෙපස තවත් කූඩාරම් තනා ඇති නමුත් සෑම කෙනෙකුටම ඒවා ප්‍රමාණවත් තරමින් නොමැත. බිම අතුරා ඇති පාපිසි මත මිනිසුන් දහස් ගණනක් නිදා සිටිනු පෙනෙන්නට තිබේ.
වසර සියයකට පමණ පසුව මොරොක්කෝවට බලපෑ දරුණුතම භූමිකම්පාවෙන් මේ වනවිට අවම වශයෙන් පුද්ගලයන් 2,122 ක් මිය ගොස් 2,421 කට වැඩි පිරිසක් තුවාල ලබා ඇති අතර එරට රජය දින තුනක ශෝක දිනයක් සහ නිවාඩුවක් ප්‍රකාශයට පත්කර තිබේ. ලේ බැංකු, ජලය, ආහාර, කූඩාරම් සහ බ්ලැන්කට් තොග වැඩි කිරීම සඳහා සිවිල් ආරක්ෂක ඒකක යොදවා ඇති බව එරට රාජකීය මාළිගාව පවසා තිබෙනවා.
-BBC News ඇසුරෙනි-
Photo Credit: www.middleeasteye.com / www.indianexpress.com
