පාසල් නිවාඩුවේ සරුංගල් අනතුරු ඉහළට

පාසල් නිවාඩුවේ සරුංගල් අනතුරු ඉහළට

අගෝස්තු පාසල් නිවාඩුවත් සමඟ සරුංගල් යැවීමේදී සිදුවන අනතුරු බහුලව වාර්තා වන බැවින් දරුවන්ගේ ආරක්ෂාව පිළිබඳව විශේෂ අවධානයක් යොමු කරන්නැයි රිජ්වේ ආර්යා ළමා රෝහලේ වැඩබලන අධ්‍යක්ෂ, විශේෂඥ වෛද්‍ය ප්‍රදීප් රත්නසේකර නිවේදනයක් නිකුත් කරමින් ඉල්ලා සිටී.

සරුංගල් යැවීම දරුවන් අතර ජනප්‍රිය වුවද, නොසැලකිලිමත් ලෙස සරුංගල් යැවීම හේතුවෙන් බරපතළ තුවාල මෙන්ම දරුවන්ට ජීවිත අවදානම් පවා ඇතිවිය හැකි බව ඔහු පෙන්වා දෙයි. විශේෂයෙන් උස් ස්ථානවල සිට සරුංගල් යැවීමේදී ඇදවැටීම් සිදුවීමත්, කණ්ඩායම් වශයෙන් සරුංගල් යැවීමේදී ගැටීම් හා වැටීම් හේතුවෙන්ද අනතුරු සිදුවිය හැකි බව වෛද්‍යවරයා සඳහන් කරයි.

එමෙන්ම අධිබලැති විදුලි රැහැන් ආසන්නයේ සරුංගල් යැවීම ඉතා අවදානම් බවත්, සරුංගල් නූල් විදුලි රැහැන්වල ගැටීමෙන් විදුලි ධාරාව නූල ඔස්සේ පුද්ගලයා වෙත සම්ප්‍රේෂණය විය හැකි බවත් පෙන්වාදෙන වෛද්‍යවරයා, එවැනි විදුලි සැර වැදීම් හේතුවෙන් අත්, බාහු සහ පපු ප්‍රදේශයේ ශරීර පටක, රුධිර වාහිනී සහ ස්නායුවලට දැඩි හානි සිදුවිය හැකි අතර, ඇතැම් අවස්ථාවල හානි වූ ශරීරාංග ශල්‍යකර්ම මගින් ඉවත් කිරීමට පවා සිදුවන බව අවධාරණය කරයි. එබැවින් විදුලි රැහැන් පවතින ප්‍රදේශවල සරුංගල් යැවීමෙන් දරුවන් වළක්වා ගැනීමට මවුපියන් වගකීමෙන් කටයුතු කළ යුතු බවද අධ්‍යක්ෂවරයා වැඩිදුරටත් සඳහන් කර සිටී.

✍️ ධාරා අබේනායක විසිනි.