හිටපු පොලිස්පතිවරයාගේ අවමංගල්‍යයට පොලිස් ගෞරව
මෙරට 35 වැනි පොලිස්පතිවරයා ලෙස කටයුතු කළ සී.ඩී. වික්‍රමරත්නගේ අවසන් කටයුතු පොලිස් ගෞරව සහිතව බොරැල්ල කනත්තේදී සිදු කෙරිණි. මියයන විට 63 හැවිරිදි වියේ පසුවූ ඔහු 1986 වසරේදී පොලිස් සේවයට එක් විය. 2019 වසරේ පාස්කු ඉරුදින ත්‍රස්ත ප්‍රහාරයෙන් අනතුරුව එවකට පොලිස්පති පූජිත් ජයසුන්දරගේ සේවය අත්හිටුවීමත් සමඟ වැඩබලන පොලිස්පතිවරයා ලෙස උසස් කෙරුණු අතර 2020 වසරේ නොවැම්බර් 27 වැනිදා පොලිස්පති ධුරයට පත් විය.
2023 වසරේ මාර්තු 25 වැනිදා විශ්‍රාම යාමට නියමිතව සිටියද, නව පොලිස්පතිවරයකු පත් කරන තෙක් එවකට ජනාධිපතිවරයා වූ රනිල් වික්‍රමසිංහ විසින් අවස්ථා කිහිපයකදී සේවා දිගු ලබාදීම හේතුවෙන් සී.ඩී. වික්‍රමරත්න තවත් මාස 8කට ආසන්න කාලයක් පොලිස්පති ධුරයේ කටයුතු කරනු ලැබුවේය. අනතුරුව 2023 වසරේ නොවැම්බර් 23 වැනිදා පොලිස්පති ධුරයෙන් විශ්‍රාම ගනු ලැබිණි.
හිටපු පොලිස්පතිවරයා පසුගිය සිකුරාදා වෙඩි වැදීමකින් මියගොස් තිබු අතර ඔහුගේ මරණය දිවි හානි කර ගැනීමක් බවට සැක කෙරෙන බවත්, සිය ආරක්ෂක නිලධාරියාගේ ගිනි අවියෙන් ඔහු වෙඩි තබාගෙන ඇති බවටත් පොලිසිය සැක පළ කරයි.ඔහුගේ දේහය සම්බන්ධයෙන් සිදුකළ පශ්චාත් මරණ පරීක්ෂණයේදී විවෘත තීන්දුවක් නැගෙනහිර කොළඹ රෝහලේ අධිකරණ වෛද්‍ය නිලධාරීවරයා විසින් ලබාදී ඇති අතර, හිටපු පොලිස්පතිවරයාගේ සිරුරේ කොටස් සහ වෙඩිතබා ගත් බව කියන ගිනි අවියද රජයේ රස පරීක්ෂකවරයා වෙත යොමු කිරීමට ද පියවර ගෙන ඇත.
සිද්ධිය සම්බන්ධයෙන් බස්නාහිර පළාත දකුණ දිසා අපරාධ කොට්ඨාසය සහ මාලබේ පොලිසිය වැඩිදුර විමර්ශන සිදු කරයි. විමර්ශනවලට අදාළව ඒ මහතාගේ බිරිඳ සහ ආරක්ෂක නිලධාරීන් තිදෙනකුගෙන් ප්‍රකාශ සටහන් කරගෙන ඇති බව බස්නාහිර පළාත දකුණ දිසා අපරාධ කොට්ඨාසය පවසයි.
✍️ ධාරා අබේනායක විසිනි.
