The Iceman – ඔහු ආදරණීය ස්වාමිපුරුෂයෙක්. ආදරණීය පියෙක්. සිය රූමත් බිරිඳ සහ සුරතල් දියණියන් දෙදෙනා කෙරෙහි ඔහු දැක්වූ ප්‍රේමය බොහොම ප්‍රභලයි. එමෙන්ම, නාඳුනන්නෙකු වෙත ගොස්, එක් ක්ෂණයකින් ඔහුගේ ගෙල කපා දමා හෝ වෙනත් ඕනෑම ආකාරයකින් පුද්ගලයෙකු ඝාතනය කිරීම සඳහා ඔහු සතුවූ පළපුරුද්දද බොහෝ ප්‍රබලය.
රිචඩ් ගතකළේ සතුටින් පිරුණ පවුල් ජීවිතයක්. නමුත්, තමන්ගෙ “රැකියාව” ගැන, තමා අන්‍යයන්ගේ සතුට සැනසුම විනාශ කරන්නෙකු බව ඔහු පවුලේ අයගෙන්, ලෝකයෙන් වසං කරගෙන සිටියේ අතිදක්ෂ අන්දමින්. තම බියකරු ප්‍රතිරූපය ඔහු ලෝකයෙන් සඟවා ගෙන සිටියේ සෙනෙහෙබර පියෙක්ය යන වෙස්මුහුණෙන්. ඔහුට ඕනෙ උනා කුරිරු ලෝකයෙන් තමන්ගෙ බිරිඳවත් දරුවන්වත් ප්‍රවේශම් කරගන්න. ලෝකය බොහොම කුරිරු තැනක් බව ඔහු අවශ්‍ය තරමටත් වඩා වැඩියෙන් දැන සිටියා. එහි කුරිරු මිනිසුන් පිරී සිටියා. ඉතින් පිරිමියෙක් විදිහට ඔහුට අවශ්‍ය වුණා. තමා වැනිම විෂ සහිත මිනිසුන් පිරී සිටින ලෝකයෙන් තම ආදරණීය පවුල ආරක්ෂා කරගන්න.
ඝාතකයෙකු ලෙසින් මිනිස් ජීවිත ගොදුරු කරගත්, ඔහුත් මේ සමාජයේ ගොදුරක් නොවේද…? ඝාතකයෙකු නිර්මාණය කිරීම සඳහා දායකත්වය සපයන්නේත් ඔහු ඉපදුන, හැදුන වැඩුණ සමාජය විසින්ම නොවේද…? Iceman යන අන්වර්ථ නාමයෙන් හඳුන්වනු ලැබූ පුද්ගලයන් සියයකට අධික ප්‍රමාණයක් ඝාතනය කෙරූ අමෙරිකානු, කුලී ඝාතකයෙකු වූ Richard Kuklinski ගේ ජීවිත කතාව ඇසුරින් The Iceman සිනමාපටය නිමැවී තිබෙනවා.
