The Drought – කාලයක් තිස්සේ පවතින දැඩි නියඟය හේතුවෙන් උඩවලව ජලාශයේ ජල මට්ටම 2% දක්වා පහළ ගොස් ඇති බව පවසන කෘෂිකර්ම අමාත්‍ය මහින්ද අමරවීර, එම ජලාශය යටතේ පවතින යල කන්නයේ අස්වද්දන ලද කුඹුරුවලින් අක්කර හැටපන්දහසක් පමණ හානි වීමේ අවධානමට ලක්ව ඇතැයි පවසනවා.
උද්ගතව ඇති තත්වයට පිළියම් ලෙස සමනල වැවෙන් උඩවලව ජලාශයට ජලය ලබාගැනීමට අපේක්ෂා කළද, එය විදුලි ජනනය සඳහා බලපෑම් ඇතිකළ හැකි බැවින් අසාර්ථක වූ බවත් මොණරාගල දිස්ත්‍රික්කයේ වැව් කිහිපයකින් වේලි ඔය අමුණ හරහා උඩවලව ජලාශයට ජලය ලබාගැනීමට මේ දිනවල කටයුතු කරමින් පවතින බවත් වාර්තා වනවා.
උඩවලව ජලාශයට අවශ්‍ය කරන ජලය ප්‍රමාණය ලබාගැනීමට නොහැකි වුවහොත් වී වගාවෙන්,කෙසෙල් ඇතුළු අනෙකුත් බෝග වගාවන්ගෙන් හා විදුලි උත්පාදනයෙන් විය හැකි පාඩුව රුපියල් මිලියන තිස්දහස ඉක්මවන බව ගණන් බලා ඇතැයි කෘෂිකර්ම අමාත්‍ය මහින්ද අමරවීර පවසා සිටිනවා.
