On max DT – මහා පරිමාණ පිරමීඩ ජාවාරමක් සම්බන්ධයෙන් චෝදනා එල්ල වී තිබෙන ඔන්මැක්ස් ඩී. ටී. පුද්ගලික සමාගමේ සභාපතිවරයා ඇතුළු තිදෙනකු ජාත්‍යන්තර පොලිසිය හරහා අත්අඩංගුවට ගැනීමට රතු නිවේදන නිකුත් කිරීම සඳහා ඊයේ (11 වෙනි සඳුදා) අධිකරණය විවෘත වරෙන්තුවක් නිකුත් කර තිබේ. අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය විසින් කරන ලද ඉල්ලීමකට අනුව එලෙස වරෙන්තු නිකුත් කර ඇත්තේ, කොළඹ ප්‍රධාන මහෙස්ත්‍රාත් ප්‍රසන්න අල්විස් විසිනි.
මෙම පිරමීඩ ජාවාරමේ මහ මොළකරු බව කියන ජෝර්ජියානු ජාතික කකබර් අස්ලානිස් විලීස් නමැති අය සහ පිරමීඩ නඩුවේ 06 වන සැකකරු ලෙස නම්කර අධිකරණයට ඉදිරිපත් කර ඇප ලැබීමෙන් අනතුරුව මෙරටින් පලා ගොස් තිබෙන ඔන්මැක්ස් ඩී.ටී. පෞද්ගලික සමාගමේ වෙබ් අඩවිය නිර්මාණය කරන ලද ‘‘වී ටෙක්’’ මෘදුකාංග ආයතනයේ හිමිකරු වන මෘදුකාංග ඉංජිනේරු ගයාන් චාමර වික්‍රමතිලක සහ එම සමාගමේ සභාපතිවරයා වන සෑම් බස්නායක යන තිදෙනාට මෙලෙස අධිකරණය විවෘත වරෙන්තු නිකුත් කර තිබේ.
