Iranian Nuclear වැඩසටහන සහ ඉරාන ඩ්‍රෝන් යානා රුසියාවට ලබාදීම ගැන ඇමරිකාවේ කනස්සල්ල පිළිබඳව කටාරය, මේ සතියේ ඇමරිකාව සහ ඉරානය සමඟ වෙන,වෙනම ද්විපාර්ශ්වික රැස්වීම් පැවැත්වූ බව මේ සම්බන්ධ විශ්වාසවන්ත ප්‍රවෘත්ති මූලාශ්‍ර දෙකක් බදාදා ප්‍රකාශයට පත් කර තිබු බව Reuters පුවත් සේවය වාර්තා කරයි. කටාර් රාජ්‍ය තාන්ත්‍රිකයින් පවසන්නේ මෙම හමුව සහ ඇමරිකා -ඉරාන සිරකරුවන් හුවමාරුව අතර සම්බන්ධයක් නොමැති බවත්,තමන් ඒ සඳහා මැදිහත් නොවූ බවත්ය.
ප්‍රවෘත්ති මුලාශ්‍ර ලබාදීමේදී එම ප්‍රවෘත්තියේ සංවේදීභාවය සළකා එය නිර්නාමිකව ලබාදී ඇති අතර නිව්යෝර්ක්හි වාර්ෂික එක්සත් ජාතීන්ගේ මහා මණ්ඩලයට සමගාමීව එම හමුව පැවති බව පමණක් සඳහන් කර තිබේ. එමෙන්ම මැදපෙරදිග රාජ්‍ය තාන්ත්‍රික නිලධාරියෙකු මේ සම්බන්ධයෙන් කරුණු පැහැදිලි කරමින්, මේ සතියේ අමතර ද්විපාර්ශ්වික සාකච්ඡා පැවැත්වෙන බව පැවසූ නමුත් වැඩිදුර තොරතුරු ලබාදීමෙන් වැළකී සිටි බව සඳහන්. මේ පිළිබඳව විස්තර ලබාගැනීමට Reuters පුවත් සේවය ඉරාන,කටාර් සහ ඇමරිකානු රාජ තාන්ත්‍රික නිලධාරින් සම්බන්ධ කරගැනීමට උත්සාහ කළත් ඔවුන් ඒ සඳහා ප්‍රතිචාර දැක්වීමට සෘජුව ඉදිරිපත් නොවූ බව වාර්තා වේ.
ටෙහෙරානයේ න්‍යෂ්ටික අභිලාෂයන් මැඩපැවැත්වීම සහ ඇමරිකානු සම්බාධක දැඩි කිරීම අරමුණු කරගත් 2015 ගණුදෙනුවලින් එවක ජනාධිපති Donald Trump ඉවත් වූ බැවින්, 2018 සිට ඇමරිකාව සහ ඉරානය අතර සබඳතා දුර්වලව පැවතිණි. මේ අතර යුක්‍රේනයට පහර දීම සඳහා ඉරානය රුසියාවට ප්‍රහාරක ඩ්‍රෝන යානා ලබා දී ඇති අතර ටෙහෙරානය එය නතර කිරීමට අවශ්‍ය බව ද ඇමරිකාව පවසයි. නමුත් යුක්‍රේනයට පහරදීම සඳහා තමන් රුසියාවට ඩ්‍රෝන යානා ලබාදී නොමැති බවයි ඉරානය පවසන්නේ. ඉරාන න්‍යෂ්ටික ගිවිසුම පාලනය කිරීමට Joe Bidan පරිපාලනය දැරූ උත්සාහයන් අසාර්ථක වී ඇති අතර ඉරානයේ න්‍යෂ්ටික දියුණුව හේතුවෙන් ඔවුන් පාලනයෙන් තොර වී ඇති බවයි බොහෝ රාජ්‍ය තාන්ත්‍රිකයින්ගේ අදහස.
-Reuters ඇසුරෙන් Parisa Hafezi, Jonathan Landay සහ Arshad Mohammed විසිනි.
Photo Credit: www.reuters.com
