Court order – ගෝණෙකු වෙඩි තබා ඝාතනය කර, ජීප් රථයකින් රැගෙන යමින් සිටියදී අත්අඩංගුවට ගත් සැකකරුවන් තිදෙනෙකු මෙම මස 31 වැනිදා දක්වා රක්ෂිත බන්ධනාගාරගත කිරීමට නුවරඑළිය මහේස්ත්‍රාත් අධිකරණය නියෝග කර තිබෙනවා.
ඒ අනුව, මෙම සැකකරුවන් නුවරඑළිය පොලිස් ස්ථානයේ නිළධාරින් විසින් නුවරඑළිය මහේස්ත්‍රාත් ලංකාංගනී ප්‍රබුද්ධිකා වෙත ඉදිරිපත් කළ අවස්ථාවේදී මෙම නියෝගය ලබාදී ඇති බවයි සඳහන් වෙන්නේ.
අවුරුදු 40 – 50 යන වයස්වල පසුවන කුරුණෑගල සහ දංකොටුව ප්‍රදේශයේ පදිංචිකරුවන් තිදෙනෙක් මෙලෙස රක්ෂිත බන්ධනාගාරගත කර තිබෙනවා.
ඔවුන් තිදෙනා විසින් නුවරඑළිය, සීතා අම්මාන් කෝවිල අසළ රක්ෂිතයේ සැරිසරමින් සිටි ගෝණෙකු වෙඩි තබා ඝාතනය කර, ජීප් රථයකින් දංකොටුව දක්වා රැගෙන යමින් සිටියදී, නුවරඑළිය රථවාහන අංශයේ පොලිස් නිලධාරින් විසින් අත්අඩංගුවට ගෙන තිබුණා.
අත්අඩංගුවට ගත් සැකකරුවන් පරික්ෂා කිරීමේදී බලපත්‍ර නොමැති බෝර 12 ගිනි අවියක්, උණ්ඩ 09 ක් සහ කුඩා ඊයම් බෝල 174ක් සොයාගෙන ඇති බවයි වැඩිදුරටත් සඳහන් වෙන්නේ.
