Cannabises – කංසා වගා කිරීමේ නියමු ව්‍යාපෘතිය ලබන මාසයේ ආරම්භ කිරීම සඳහා මේ වන විට විදෙස් ආයෝජකයන් 11 දෙනෙකු කැමැත්ත පළ කර ඇති බව සංචාරක රාජ්‍ය අමාත්‍ය ඩයනා ගමගේ පවසනවා. ඇය මේ බව පවසා සිටියේ, සංචාරක රාජ්‍ය අමාත්‍යාංශයේදී පැවති මාධ්‍ය සාකච්ඡාවකදී ය.
කටුනායක ආයෝජන වෙළෙඳ කලාපයේ (BOI) මෙම ව්‍යාපෘතිය ආරම්භ කිරීමට සැලසුම් කර ඇති බවත්, ඒ සඳහා පත් කර ඇති විද්වත් කමිටුව මඟින් යහපත් ප්‍රතිචාර ලැබී ඇති බව සඳහන් කළ අමාත්‍යවරිය, මේ තුළින් ඉදිරි වසර දෙක තුළ පමණක් රුපියල් බිලියන 5කට අධික ආදායමක් උපයා ගැනීමට හැකි බව සඳහන් කළාය.
පසුගිය සමයේ මෙම ව්‍යාපෘතිය නිළධාරීන් අතර පැවති ගැටුම්වලින් විනාශ වූ නමුත්, මෙවර එය අසාර්ථක වීමට කිසිදු අවස්ථාවක ඉඩ නොදෙන බව තරයේ කියා සිටි ඇය, නව ආයෝජන ව්‍යාපෘතියක් ලෙස ක්‍රියාත්මක කරන මෙම වැඩසටහන සඳහා දෙස් විදෙස් ආයෝජකයන් විශාල සංඛ්‍යාවක් කැමැත්ත පළ කර ඇති බව වැඩිදුරටත් පවසා සිටියාය.
