Threat – රජයේ වෛද්‍ය නිලධාරීන්ගේ සංගමයේ අනුරාධපුර දිස්ත්‍රික් ලේකම් සහ කැකිරාව සෞඛ්‍ය වෛද්‍ය නිලධාරී අසිත කෝසල තනිප්පුලි ආරච්ච්ට මරණීය තර්ජනය කිරීමේ සිද්ධියක් සම්බන්ධයෙන් විමර්ශනයක් ආරම්භ කොට ඇතැයි කැකිරාව පොලිසිය පවසයි. ඊයේ [ජුලි 15] මෙම මරණ තර්ජනය සිදුකර ඇත්තේ කැකිරාව සෞඛ්‍ය වෛද්‍ය නිලධාරී කාර්යාලයට අයත් ගොඩනැගිලි දෙකක අලවන ලද පෝස්ටර් මඟිනි.
“වහාම කැකිරාවෙන් පලයන් නොගියොත් උඹටත් ක්ලබ් වසන්තට කරපු දේ කරනවා” යන අදහස සහිත පෝස්ටර් අලවා, එම කාර්යාලයට අයත් ගොඩනැගිලි දෙකට කළු තෙල් ප්‍රහාරයක් එල්ල කර තිබෙන අයුරු දැක, කාර්යාලයේ සෙසු නිලධාරීන් විසින් කැකිරාව පොලිසිය වෙත පැමිණිල්ලක් ඉදිරිපත් කොට තිබේ. මෙම අවස්ථාවේ වෛද්‍යවරයා කාර්යාලය තුළ සිට නොමැති අතර ආහාර පනත යටතේ මරදන්කඩවල සහ ගනේවල්පොළ ප්‍රදේශයේ මහා පරිමාණ ව්‍යාපාරිකයකයින් දෙදෙනෙකුට එරෙහිව කැකිරාව මහේස්ත්‍රාත් අධිකරණය හමුවේ පවරා ඇති නඩු දෙකක් සම්බන්ධයෙන් නීති උපදෙස් ලබා ගැනීමට නීතිපති දෙපාර්තමේන්තුව හා සෞඛ්‍ය අමාත්‍යාංශය වෙත ගොස් සිටි බව වාර්තා වේ.
