Child Harassment – තම දරුවන් දෙදෙනාට පහර දි එය වීඩියෝ ගත කර සමාජ මාධ්‍යට එක් කළේ යැයි කියන එම දරුවන්ගේ පියා අද (7 වෙනි බදාදා ) අත්අඩංගුවට ගත් බව දිඹුල පතන පොලිසිය සඳහන් කරයි. එම පොලිස් වසමේ වතු යායක පදිංචිව සිටින 33 හැවිරිදි සැකකාර පියා ඉකුත් (05) දින රාත්‍රියේදී අවුරුදු නවයක් සහ පහක් වයසැති සිය දරුවන් දෙදෙනාට පහර දි ඇති බවත්, පහරදෙන අයුරු වීඩියෝ සාක්ෂියක් ලෙසින් සමාජ මාධ්‍යයන්හි සංසරණය වී ඇති බවත් පොලිසිය පවසයි.
සැකකරුගේ බිරිද ගෘහසේවය සදහා විදේශ ගතව සිටින අතර පියා කොළඹ ප්‍රදේශයේ වාහන පිරිසිදු කිරිමේ මධ්‍යස්ථානයක සේවය කරන අයෙකු බවත්, දරුවන් දෙදෙනා සිට ඇත්තේ මිත්තණිය භාරයේ බවත් දැනගන්නට ලැබේ. සිය දරුවන් දෙදෙනා පියාගේ උපදෙස් පිළිනොපැදීම හේතුවෙන් ඔවුනට අතින් පහරවල් කිහිපයක් ගසා ඇති බව පොලිසියට සිය මුලික පරික්ෂණ වලදී අනාවරණය කරගෙන තිබේ. පොලිස් භාරයට ගත් දරුවන් දෙදෙනා දික්ඔය මුලික රෝහලේ අධිකරණ වෛද්‍යවරයා වෙත යොමු කර ඇති අතර සැකකරු හැටන් මහේසේත්‍රාත් අධිකරණය වෙත ඉදිරිපත් කරන බව දිඹුල පතන පොලිසිය පවසා ඇත.
