සිනමාවට නැගුණු Roofman ගේ කතාව
සොරකම අපරාධයක්. සොරෙක් දිහා සමාජය අප්‍රසාදයෙන්, වෛරයෙන් බලන්නෙ සිදුකළ අපරාධය නිසා. වරද අමතක කර සොරෙකුගේ ජීවිතය දෙස බැලුවහොත් සමහරවිට ඔහුට සොරකමට (සාධාරණ) හේතු තිබෙනවා වෙන්න පුළුවන්. සොරකම ජීවිතය කරගත්, පුරුද්දක් කරගත් අය අතරෙ එවැනි පුද්ගලයනුත් ඉන්නවා. නමුත් වරද යනු වරදමයි.
Jeffrey Manchester කියන්නෙ හිටපු අමෙරිකානු හමුදා නිලධාරියෙක්. ඔහු දරුවන් තුන්දෙනෙක්ගෙ පියෙක්. වහලවල් වලින් මැක්ඩොනල්ඩ්ස් අවන්හල්වලට කඩා වැදිලා සොරකමේ යෙදුණු නිසා මිනිස්සු ඔහුව හැඳින්වුවෙ Roofman කියන නමින්. පොලිස් අත්අඩංගුවට පත්වුණාට පස්සෙ ඔහුට දිගු කාලීන සිර දඬුවම් නියම වෙනව. බොහොම ඉක්මන්ට එතනින් පලා ආව ජෙෆ්‍රි නගරයේ සුප්‍රකට සෙල්ලම් බඩු වෙළඳසලක සැඟවෙලා මාස ගණනක් ජීවත් වුණා. මේ කතාව ඔහු ගැන. පොලිසිය තමා ලුහුබැඳ ආවත්, සියල්ලන් ඔහුව සෙව්වත් ඔහු ජීවිතය පිළිබඳ බලාපොරොත්තු අත් හැරියෙ නැහැ. ඔහුට ඕනෙ වුණා තමන්ගෙ දරුවො ළඟට යන්න.
ලෝකයට සොරෙක් වුණත් මේ කතාවෙන් ජීවත්වීම වෙනුවෙන් ඔහු කරන සටන, ඔහුගෙ පෞද්ගලික ජීවිතය, හැඟීම් බොහොම මෘදු ආකාරයට ප්‍රේක්ෂකයන්ට දැනෙන්න සලස්වනවා. සමහරවෙලාවට දුර දිග නොබලා කරන දේවල්වලින් අමාරුවෙ වැටෙන්නෙ අපි විතරක් නෙමෙයි, අපේ ආදරණීයයන්ටත් ඉන් හානි සිද්ධවෙනවා. එයින් අහිමි වෙන්නෙ අපේ ජීවිතවල සාමකාමී බව, සතුට, සැනසුම. Roofman ලෙසින් ප්‍රකට වූ හිටපු අමෙරිකානු හමුදා නිලධාරී Jeffry Manchester ගේ සත්‍ය ජීවිත කතාව ඇසුරින් මෙම චිත්‍රපටය නිමැවී තිබෙනවා.
