දුස්සීල භික්ෂූන්ට වෙසක් පණිවිඩයක්
විනය විරෝධී කටයුතුවල යෙදෙන භික්ෂූන්ට තරාතිරම නොබලා දඬුවම් කිරීමටත්, භික්ෂූන් වහන්සේලාගේ විනය කටයුතු පවත්වාගෙන යෑම සඳහාත් බෞද්ධ විහාර දේවාලගම් පනත සංශෝධනය කිරීමට සංඝ සභාවන්හි ලේඛකාධිකාරී හිමිවරුන්ගෙන් වාර්තාවක් කැඳවා ඇතැයි බෞද්ධ කටයුතු කොමසාරිස් ජනරාල් ගාමිණී සේනාරත්න පැවසීය.
එම වාර්තාව ලැබුණු වහාම බෞද්ධ විහාර දේවාලගම් සංශෝධන පනත් කෙටුම්පත සකස් කිරීමට නීති කෙටුම්පත් දෙපාර්තමේන්තුවට යොමු කරන බවද හෙතෙම අවධාරණය කළේය. ලේඛකාධිකාරී හිමිවරුන්ගේ වාර්තාව අද හෙටම තමන් අතට පත් වීමට නියමිත අතර මේ කාරණය සම්බන්ධයෙන් නීතිපතිවරයා සමඟ තමා පසුගිය දිනවල දීර්ඝව සාකච්ඡා කළ බවද බෞද්ධ කටයුතු කොමසාරිස්වරයා පැවසීය. තවද එම සාකච්ඡාවලදී පැහැදිලි එකඟතා කිහිපයකටම පැමිණීමට හැකිවුණු බවත් කොමසාරිස්වරයා සඳහන් කළේය.
