ජනප්‍රිය ඉන්දියානු රස කැවිල්ල පොල් ලඩ්ඩු – Coconut Laddu
ඉන්දියානුවන්ගෙ ජනප්‍රියම රස කැවිල්ලක් වෙන ලඩ්ඩු අද වෙනකොට මුළු ලෝකෙම ජනප්‍රිය කෑමක්. මේක ඉන්දියාවෙ අතීතයේ ඉඳලම පැවතගෙන ආව රසකැවිලි වර්ගයක්. පිටි වර්ග, ගිතෙල් (ghee), සීනි හෝ හකුරු , කජු, මුද්දරප්පලම් වගේ දේවල් දාලායි ලඩ්ඩු හදන්නෙ. ඒ විතරක් නෙමෙයි බේසන් ලඩ්ඩු, මෝතිචූර් ලඩ්ඩු සහ පොල් ලඩ්ඩු වගේ ලඩ්ඩු වර්ග කිහිපයක්ම තියෙනව. උත්සව අවස්ථාවලට වගේම හවස තේ වෙලාවටත් ගැලපෙන රසකැවිල්ලක්. හදන්න ලොකු වෙලාවක් යන්නෙත් නැහැ. ගෙදරදීම පොල් ලඩ්ඩු හදාගන්න හැටි බලමු.
අවශ්‍ය ද්‍රව්‍ය
• ගා ගත් පොල් කෝප්ප 2ක් 
• සීනි කෝප්ප 3/4
• කිරි කෝප්ප1/2
• ගිතෙල් මේස හැඳි 1ක්
• ලුණු ස්වල්පයක්
• වැනිලා
• කලරින්
• කජු ස්වල්පයක්
• කරදමුංගු 2-3 ක්
සාදාගන්නා ආකාරය
පොල් ටික බ්ලෙන්ඩ් කරලා කුඩු කර ගන්න. ඊළඟට භාජනයක් ලිපේ තියලා ඒකට ගිතෙල් හැන්දක් දාලා රත් කර ගන්න. ගිතෙල්වලට කජු කෑලි දාලා ටිකක් බැදගන්න. ඊට පස්සෙ එම භාජනයටම පොල්, සීනි හා කිරි දාලා රත් කර ගන්න. දැන් කරදමුංගු සහ ලුණු එකතු කරන්න. කිරි ටික හිඳීගෙන එනකොට වැනිලා, කලරින් සහ බැදගත් කජු ටික එකතු කරලා මිශ්‍රණයේ තෙත ගතිය හිඳුනට පස්සෙ ලිපෙන් බාගන්න. මිශ්‍රණය නිවුණට පස්සෙ බෝල හැඩයට ලඩ්ඩු හදා ගන්න.
