SL Vs BAN TEST – ශ්‍රී ලංකාව සහ බංග්ලාදේශය අතර පැවැත්වෙන දෙවැනි සහ අවසන් ටෙස්ට් ක්‍රිකට් තරගයෙන් ඉනිමක සහ ලකුණු 78 ක සුවිශේෂී ජයග්‍රහණයක් අත්කර ගැනීමට ශ්‍රී ලංකා කණ්ඩායම අද සමත්වුණා.
ඒ අනුව නව ලෝක ටෙස්ට් ශූරතා තරගාවලියේ තමන් මුහුණදුන් පළමු තරගාවලි‍යම 1-0 ක් ලෙස ජය ගැනීමට ශ්‍රී ලංකා කණ්ඩායම සමත්වුණා.
ඊයේ තෙවැනි දිනය සඳහා තරගය නතර කරන විට, සිය දෙවැනි ඉනිම සඳහා පන්දුවට පහරදෙමින් සිටි බංග්ලාදේශ කණ්ඩායම කඩුලු 06 ක් දැවී ලකුණු 115 ක් ලබා සිටි අතර, අද උදෑසන පැය භාගයක පමණ කාලයකදී ඉතිරි කඩුලු සියල්ල දවා ගැනීමට ශ්‍රී ලංකා පන්දු යවන්නන් සමත්වුණා.
ඒ අනුව බංග්ලාදේශයට සිය දෙවන ඉනිම සඳහා ලබාගත හැකි වූයේ ලකුණු 133 ක් පමණක් වන අතර, එහිදී කිසිදු බංග්ලාදේශ පිතිකරුවෙකුට ලකුණු 26 කට වඩා ලබාගත නොහැකි වුණා.
ශ්‍රී ලංකාව වෙනුවෙන් පන්දු යැවීමේදී ප්‍රභාත් ජයසූරිය කඩුලු 05 ක් දවාගත් අතර, නායක ධනංජය ද සිල්වා සහ තරිඳු රත්නායක කඩුලු දෙක බැගින් දවා ගැනීමට සමත් වුණා.
සිය පළමු ඉනිම සඳහා සියලු දෙනා දැවී ලකුණු 458 ක් ලබා ගැනීමට ශ්‍රී ලංකා කණ්ඩායම සමත් වූ අතර, එහිදී පැතුම් නිස්සංක ලකුණු 158ක්, දිනේෂ් චන්දිමාල් ලකුණු 93 ක් හා කුසල් මෙන්ඩිස් ලකුණු 84 ක් ලබාගත්තා.
බංග්ලාදේශ කණ්ඩායම සිය පළමු ඉනිමට ලකුණු 247 ක් වාර්තා කළා.
