Norochchole – නඩත්තු කටයුත්තක් හේතුවෙන් නොරොච්චෝලේ බලාගාරයේ පළමු ජනන යන්ත්‍රය අද (13) මධ්‍යම රාත්‍රියේ සිට ක්‍රියා විරහිත කරන බව ලංකා විදුලි බල මණ්ඩලය පවසනවා.
ඒ අනුව එම නඩත්තු කටයුතු අවසන් කිරීම සඳහා දින 25ක කාලයක් ගතවන බවත්, එම ජනන යන්ත්‍රය අක්‍රිය කිරීමෙන් ජාතික පද්ධතියට අහිමිවන විදුලි ධාරිතාව මෙගාවොට් 300 ක් වන බවයි විදුලිබල මණ්ඩලයේ මාධ්‍ය ප්‍රකාශක ධම්මික විමලරත්න සඳහන් කළේ.
මේ අතර නඩත්තු කටයුතු හේතුවෙන් මාස එකහමාරක පමණ කාලයක් අක්‍රිය කර තිබුණු කැළණිතිස්ස සංයුක්ත චක්‍රීය බලාගාරය අද මධ්‍යම රාත්‍රියේ සිට යළි සක්‍රිය කිරීමට නියමිත අතර, ඉන් ජාතික පද්ධතියට එක් කෙරෙන විදුලි ධාරිතාව මෙගාවොට් 165 ක් බව සඳහන්.
පවතින වැසි තත්ත්වයත් සමග ජල විදුලි නිෂ්පාදනයට වැඩි අවස්ථාවක් පැවතීම නිසා, මේ ආකාරයෙන් විදුලි බලාගාර නඩත්තු කටයුතු සිදුකරන බවයි මාධ්‍ය ප්‍රකාශකවරයා වැඩිදුරටත් ප්‍රකාශ කර සිටියේ.
