ICC Men’s Cricket World Cup Qualifier සුදුසුකම් ලැබීමේ තරගාවලියේ සුපිරි හය අදියරේ පළමු තරඟය ලකුණු 21 කින් ජය ගැනීමට ශ්‍රී ලංකාව සමත්වුණා. තරඟය පැවැත්වුනේ නෙදර්ලන්ත කණ්ඩායම සමග බුලවායෝහිදියි.
ශ්‍රී ලංකා කණ්ඩායම පසුගිය තරඟ සියල්ලම ජයග්‍රහණය කරමින් සුපිරි හය අතරට පිවිසීම විශේෂත්වයක්. සුපිරි හය වටය පළමු තරඟයේ කාසියේ වාසිය දිනූ නායක දසුන් ශානක ප්‍රථමයෙන් පන්දුවට පහරදීමට තීරණය කලා.
ප්‍රථමයෙන් පන්දුවට පහරදුන් ශ්‍රී ලංකා කණ්ඩායම ඕවර 47.4ක් අවසානයේ සියලු දෙනා දැවී ලකුණු 213ක් ලබා ගැනීමට සමත්වුණා.
ධනංජය ද සිල්වා පන්දු 111කදී ලකුණු 93ක් ලබා ගත් අතර දිමුත් කරුණාරත්න පන්දු 51කදී ලකුණු 33ක් රැස් කළා. ශ්‍රී ලංකා ලකුණු පුවරුව වෙනුවෙන් මහේෂ් තීක්ෂණ ලකුණු 28, වනිඳු හසරංග ලකුණු 20 සහ කුසල් මෙන්ඩිස් ලකුණු 10ක් ලබා ගත්තා.
නෙදර්ලන්තය වෙනුවෙන් Logan van Beek සහ Bas de Leede කඩුලු 03 බැගින් දවාගත් අතර Saqib Zulfiqar කඩුලු 02ක් දවා ගැනීමට සමත්වුණා.
ශ්‍රී ලංකාව රැස්කරගත් ලකුණු 213 හඹා ගිය නෙදර්ලන්ත කණ්ඩායමට ඕවර 40 අවසානයේ සියල්ලන් දැවී ලබාගත හැකි වූයේ ලකුණු 192ක් පමණයි.
නෙදර්ලන්තය වෙනුවෙන් නායක ස්කොට් එඩ්වර්ඩ් ලකුණු 67*ක් ද, බාස් ඩි ලීඩ් ලකුණු 41ක් ද, වෙස්ලි බැරේසි ලකුණු 52 ක් ලබාගත්තා.
විශිෂ්ට පන්දු යැවීමක නිරත වූ මහේෂ් තීක්ෂණ කඩුලු 03ක් ද, වනිඳු හසරංග 02ක් ද, දසුන් ශානක, ඩිල්ෂාන් මධුශංක සහ ළහිරු කුමාර කඩුලු 1 බැගින් ද ලබාගත්තා.
