අහඹු සිදුවීම් ජිවිතේ වෙනස් කරනව – It Was Just an Accident
හැමදේකටම හේතුවක් තියෙනව. අපි අහම්බයක් කියලා හිතන දෙයක් වුණත් සිද්ධ වෙන්නෙ හේතුවක් මත. සමහර අහඹු සිදුවීම්වලට ජීවිතේ වෙනස් කරන්න පුළුවන්. මෙච්චර කාලයක් ගමන් කරමින් හිටිය මාර්ගයෙන් අපිව අයින් කරලා දාලා ජීවිතේ වෙනස්ම මගකට හරවන්න මේ කියන අහඹු සිද්ධියකට පුළුවන්. ඒක හරියට accident එකක් වගේ. බලාපොරොත්තු නොවුණ මොහොතක ඇවිත් ජීවිතේම වෙනස් කරලා දානවා. අනතුර එතරම් බැරෑරුම් එකක් නෙවෙයි නම් අපිට පුළුවන් මුකුත් නොවුනා වගේ ජීවිතේ ඉස්සරහට යන්න.
බොරු කකුලක් තියෙන කවුදෝ මනුස්සයෙක් එක රෑක තමන්ගෙ බිරිඳයි දරුවයි එක්ක ගමනක් යනව. මගදි ඔහුගෙ කාර් එක කැඩුණ නිසා ඒක හදාගන්න නාඳුනන පෙදෙසක ගරාජ් එකකට යනව. මේ ගරාජ් එකේ වැඩ කරන වහීඩ් නැමැත්තට ආගන්තුකයගෙ බොරු කකුලෙ සද්දෙ ඇහුණ ගමන් උන් හිටි තැන් අමතක වෙලා යනව. තමන් මෙච්චර කාලෙකට හොය හොය හිටිය මනුස්සය බොරු කකුලත් ඇන ඇන තමන්ගෙ දෙපා ගාවටම ඇවිත් බව වහීඩ්ට තේරෙනව. නමුත් ඒ ඔහුමද කියල නිශ්චිත නැහැ.
ඒ කොහොම වුණත්, ක්ෂණිකව ක්රියාත්මක වෙන වහිඩ් බොරු කකුල් කාරයව පැහැර ගන්නව. ඔහුට ඕනෙ වුණේ තමන්ගෙ ජීවිතේම විනාශ කරලා දැම්ම මේ මනුස්සයව මරලා දාන්න. දේශපාලන සිරකරුවෙක් විදිහට ඔහු මෑත අතීතයක දහසකුත් එකක් වදවේදනා වින්දෙ ඉක්බාල් කියන මේ බොරු කකුල් කාරයා නිසා. ඒ කාලෙ දවසම දෑස් බැඳලා තිබුණ නිසා වහීඩ් ඉක්බාල්ගෙ මූණ කවදාවත් දැකලා තිබ්බෙ නැහැ. මේ ඔහුමදැයි නිශ්චිත නැති වුනත් අමිහිරි අතීතය නිසා වහීඩ් මේ ලෝකෙ හැම බොරු කකුල් කාරයෙක්ටම වෛර කරන්න ඇති.
නමුත් මේ මිනිහ වහීඩ්ගෙ චෝදනා හැම දෙයක්ම ප්රතික්ෂේප කරනව. ඒ විතරක් නෙමෙයි තමන් මේ බොරු කකුල දැම්මෙ බොහොම මෑතකදි බවත් පවසමින් ඔහුව නොමරන ලෙස ආයාචනා කරනව. වැඩේ තවත් සංකීර්ණ වෙද්දි වහීඩ් තීරණය කරනව ඉක්බාල් ගෙ හිරකරුවො වෙලා හිටිය කිහිප දෙනෙක්ව හොයාගෙන ගිහින් මේ ඔහුමද කියල තහවුරු කර ගන්න. ඉක්බාල්ට වෛර කෙරුව මේ කණ්ඩායම අතරෙ හෙට විවාහ වෙන්න ඉන්න යුවළක්, ඡායාරූප ශිල්පිනියක් ඇතුළු කිහිපදෙනෙක් ඇතුලත්. මේ කවුරුත් තමන්ගෙ හතුරව හරිහැටි නොදැක තිබුණ නිසා ඔහුව හඳුනගන්න එක අන්ධයො ඇතාව හඳුනගැනීමට සමාන වුණා. ඊට පස්සෙ මේ කණ්ඩායම මේ මනුස්සයගෙ ඉරණම ගැන වාද කරා. මේ ඉක්බාල්මද? එය එලෙස නම් අපි ඔහුට කුමක් සිදු කරමුද?
දඬුවමකට යටත්වෙලා, සිරගතවෙලා හිටියට පස්සෙ වැරදිකාරයො වුණාට පස්සෙ ඒ දේවල් අමතක කරලා දාලා ආයෙමත් ජීවිතේ පටන් ගන්න එක ලේසි නැහැ. අතීත තුවාළ කැළැල් එක්කම ජීවිතේට මුහුණ දෙන්න වෙනව. සතුරා අපිට වඩා බලවත්. ශක්තිමත්. දේශපාලනය, මුදල් මේ හැම දෙයක්ම ඔවුන් සතුයි. කළුගලේ ඔළුව හප්ප ගන්න එක නුවණට හුරු නෑ කියන සාමාන්ය බුද්ධිය ජීවිතේ සමහර තැන්වලදි අත්යවශ්යයි. ගොඩක් වෙලාවට වැරදිකරුත්, නිවැරදිකරුත් පවතින සමාජ, දේශපාලන ක්රමය මගින් පාලනය වන, මෙහෙයවන රූකඩ පමණයි.
