ආදරේ අපිව ශක්තිමත් කරනවා – Dead of Winter
ජීවිතය ගැන අවබෝධය ලැබෙන්නෙ ජීවත්වීම තුළින්. ඒක හරියට ජලාශයක ගැඹුර දැනගන්න වතුරට බහින්නම ඕනෙ වගේ දෙයක්. කාලය ගෙවී යමින්, වැරදීම්, අහිමිවීම් සිදුවෙමින් අත්දැකීම් ලබමිනුයි අපි ශක්තිමත් වෙන්නෙ. ජීවිතේ ගැන ඉගෙන ගන්න තියෙන ප්රායෝගිකම විදිහ ජීවත්වීම.
Barb වියපත් ගැහැණියක්. සරලව ජීවත්වුණ ඇය අතීතයේ ආදරේ පිරුණ ජීවිතයක් ගෙව්ව කෙනෙක්. ඇය ජීවත්වුණේ ඒ ආදරණීය මතකයන් එක්ක. ශීත සෘතුවේ කටුක දවසක Barb උතුරු මිනසෝටාවල හිල්ඩා විල වෙත ගමන් කරන්නෙ මියගිය සැමියාගෙ අළු විලට දාන්න හිතාගෙන.
හිම කුණාටුවක් මැද්දෙ ගමන් කරන ඇය අතරමග තිබූ cabin එකකට ගොඩවදිනවා. බිහිසුණු සිදුවීම් පෙළක ආරම්භය සිද්ධවෙන්නෙ එලෙසින්. එහි වෙසෙන පිරිමියා සහ කාන්තාව තරුණ ගැහැණු ළමයෙකු සිර කරගෙන සිටින බවත් ඔවුන් ඇයව මරා දමන්නට සූදානම් වන බවත් Barb දැන ගන්නවා. එතැන් පටන් ඇගේ උත්සාහය මේ භයානක මිනිසුන්ගෙන් තරුණියව බේරා ගැනීම. ඇගේ ඒ උතුම් අරමුණ වෙනුවෙන් අවශ්ය ශක්තියත්, නොපසුබට උත්සාහයත් ඈ තුළ අඩු නැතිව තිබුණා. මේ කතාව ඇගේ වීරත්වය ගැන.
ජීවිතේ සරල, සුන්දර බව, ආදරය හඳුනන මිනිසුන් හැම මොහොතෙම උත්සාහ කරන්නෙ අනෙකා වෙනුවෙන් යහපත සිදු කරන්න. ආදරේ මිනිස්සුන්ව ශක්තිමත් කරනවා. ලෝකයට ආදරේ කරන්න පොලඹවනවා. තවකෙකුගේ ජීවිතේ වෙනුවෙන් පුංචි හරි යහපතක් කරාම අපිට පුළුවන් කවදහරි දවසක සැනසිල්ලෙ මේ ලෝකෙන් සමුගන්න.
