Movie – සහන් සහ නයෝමි කියන්නෙ කාලයක් පුරා ආදරය කරලා එකිනෙකා පිළිබඳව හොඳ අවබෝධයක් සහිතව හිතුවක්කාරෙට සිය කැමැත්තෙන් විවාහ වෙලා කුලී නිවසක ජීවිතය විනෝදයෙන් සැහැල්ලුවෙන් ගත කරන යෞවනයේ පෙම්වතුන් යුවලක්. ඔවුන්ගේ යුග දිවියට වසර ගණනාවක් ගෙවී ගියත්, ඔවුනට දරු සුරතල් බැලීමේ වාසනාව නම් හිමිවුණේ නෑ. ඒ අඩුව ඔවුනට නොදැණුනා නොවුනත්, එහෙම වෙන්න හේතු කාරණා නොතිබුණාමත් නොවේ. එක්තරා දවසක , දීර්ඝ කාලයකට පසුව මේ දෙදෙනා බැහැ දැකීමට, සහන්ගේ නැන්දා කෙනෙක් ඔවුන්ගේ නිවසට පැමිණෙනවා. ඒ නැන්දා දරුවෙකු පිළිබඳව අසනා කරුණු කාරණා නිසා , කලබල නොවී නයෝමි ලබාදෙන පිළිතුරක් හේතුවෙන්, ඔවුන් දෙදෙනාට ලොකු අභියෝගයකට මුහුණ දීමට සිදුවෙනවා .ඒ අභියෝගයට ඔවුන් මුහුණ දෙන ආකාරය තමයි, “සිහින නෙළුම් මල්” සිනමාපටය තුළින් ප්රේක්ෂකයා වෙත ගෙන එනු ලබන්නේ.
2016 වසරේ “මෝටර් බයිසිකල්” නමින් එළිදැක්වූ තම ප්රථම චිත්රපටය සඳහාම ජාතික හා ජාත්යන්තර සම්මාන රැසකින් පිදුම් ලැබූ , ශමීර නාඔටුන්න ගේ දෙවන සිනමා නිර්මාණය ලෙසින් තමයි, මෙම සිනමා නිර්මාණය තිරයට පිවිසෙන්නේ. මෙහි සහන් ලෙසින් ජනප්රිය නළු හේමාල් රණසිංහ සහ නයෝමි ලෙසින් දුෂේනි සිල්වාත් ප්රධාන චරිතයන්ට පණ පොවන අතර, උමාලි තිලකරත්න, ශ්රියාණි අමරසේන, වීණා ජයකොඩි, කළණ ගුණසේකර, දයාදේව එදිරිසිංහ, ප්රියන්ත සෙනෙවිරත්න, ලාල් කුලරත්න ඇතුළු රංගන ශිල්පීන් පිරිසක් සෙසු රංගන දායකවත්වය ලබා දී ඇත. විශ්වජිත් කරුණාරත්නගේ කැමරා අධ්යක්ෂණයෙන් ද, රවීන්ද්ර ගුරුගේ සංස්කරණයෙන් ද, මිලින්ද තෙන්නකෝන් සංගීත අධ්යක්ෂණයෙන් ද, කලා අධ්යක්ෂණයෙන් ධම්මික හේවාදුවත්ත ද , අංග රචනයෙන් බුවනෙක රණවකද, සහය අධ්යක්ෂණයෙන් දමින්ද ඩී. මඩවල ද එක්වී ඇති මෙහි ගීත ගායනයෙන්, ශශිකා නිසංසලා, මිහිඳු ආරියරත්න, අමිල පෙරේරා සමගින් ආශ්කා කුලතුංග දායකව ඇත. නිශ්චල ඡායාරූපකරණයෙන් අමාල් රෝස් එක්වී ඇති “සිහින නෙළුම් මල්” මෙරට ප්රධාන පෙලේ ව්යාපාරිකයෙකු වන වරුණ අරඹගේ නිෂ්පාදන දායකත්වය දරණ ප්රථම සිනමා නිර්මාණයයි.
