Movie – ප්‍රෞඪ ඉතිහාසයක් උරුම ශ්‍රී ලාංකිකයන්ගේ රණ ශූරයෙකු වූ ටිකිරි කුමරුගේ මුල්ලේරියාවේ සටන කේන්ද්‍ර කර ගනිමින්, ප්‍රවීණ චිත්‍රපට අධ්‍යක්ෂක සනත්අබේසේකර විසින් තිරරචනය කර අධ්‍යක්ෂණය කරනු ලබන , මුල්ලේරියා හටන සිනමා පටයේ සමාරම්භක උළෙල පසුගියදා, කොටිකාවත්ත සණස උත්සවශාලාවේදී මහා සංඝරත්නය, විශේෂ ආරාධිතයින් හා කලාකරුවන් විශාල පිරිසකගේ සහභාගිත්වයෙන් පැවැත්විණ.
එහිදී, මෙම සිනමා සිත්තම ආලෝකමත් කරන රංගන ශිල්පීන්, ශිල්පිනියන් සඳහා තිර පිටපත් ප්‍රදානය සිදුවිය. සනත් ගුණතිලක, රන්ජන් රාමනායක, ලකීඩයස්, ශ්‍රීමාල් වෙඩිසිංහ, උද්දික ප්‍රේමරත්න, ඉසුරු ලොකුහෙට්ටිආරච්චි, නදීෂා හේමමාලී, චූලක්ෂි රණතුංග, උදාරි වර්ණකුලසූරිය, පබෝධා සංදීපනී, දිනෙත් ද සිල්වා, නිරෝෂන්ඉලේපෙරුම, නිමල් පල්ලේවත්ත, රිතූ ආකර්ෂා, කැළුම් ශ්‍රී, විශ්ව ලංකා, දෙනෙත් ආකර්ෂ ඇතුළු ප්‍රවීණ සහ ජනප්‍රිය ශිල්පින් රැසකගේ රංගන දායකත්වයෙන් මෙය සිදු කෙරේ.
කැමරා අධ්‍යක්ෂණයෙන් සුජිත් නිශාන්ත, සංස්කරණයෙන් අජිත් රාමනායක, කලා අධ්‍යක්ෂණයෙන්, පසුතල නිර්මාණයෙන් හා නිෂ්පාදන සැලසුම්කරණයෙන් ධම්මික හෙවාදුවත්ත, අංග රචනයෙන් මනනුවන් රූපසිංහ, සහය අධ්‍යක්ෂණයෙන් චන්දන එදිරිසිංහ, සංගීත අධ්‍යක්ෂණයෙන් දීනේෂ් සුභසිංහද, සටන් අධ්‍යක්ෂණයෙන් සුමුදු අමල්ක සමඟින් සඳුන් පෙරේරාද, නර්තන වින්‍යාශයෙන් චන්න විජේවර්ධන, නිශ්චල ඡායාරූපකරණයෙන් අමාල් රෝශ් සමඟින් ශාන් වීන්රූ එක්වන ”මුල්ලේරියා හටන” නිෂ්පාදන සංකල්පය කොටිකාවත්ත, මුල්ලේරියාව ප්‍රාදේශීය සභාවේ ලේකම් අනුර සිරිවර්ධනගෙනි.
