Customs – රේගු පරීක්‍ෂණ කටයුතු සඳහා භාණ්ඩ පරීක්‍ෂණ අංගයේ නවතා තිබූ නීති විරෝධීව ආනයනය කළ සුවඳ විලවුන් සහ ආලේපන අඩංගු කන්ටේනරයක් ව්‍යාජ ලේඛන සකසා රේගුවෙන් නිදහස් කිරීමේ චෝදනාවට ජ්‍යෙෂ්ඨ රේගු අධ්‍යක්‍ෂවරයකු ඇතුළු ඉහළ නිලධාරීන් සිව් දෙනෙකුගේ වැඩ තහනම් කළ බව රේගු දෙපාර්තමේන්තුවේ උසස් නිලධාරියෙකු පවසයි. වැඩතහනම් කළ නිලධාරීන් අතර නියෝජ්‍ය රේගු අධ්‍යක්‍ෂවරියක්, නියෝජ්‍ය රේගු අධ්‍යක්‍ෂවරයෙකු සහ රේගු අධිකාරිවරයෙකු සිටින බවත්, මෙරට ලියාපදිංචි නොකළ එම සුවඳ විලවුන් සහ ආලෝපන වල වටිනාකම රුපියල් කෝටියකට අධික වියහැකි බවත් රේගු දෙපාර්තමේන්තුවේ උසස් නිලධාරියා සඳහන් කරයි.
එම කන්ටේනරයේ නීති විරෝධී සුවඳ විලවුන් සහ ආලේපන අඩංගු බව සොයාගැනීමෙන් පසු , රේගු භාරයට ගෙන ආනයනකරුට දඩ මුදල් පැනවුවද, ඔහු දඩ මුදල් ගෙවා නොමැති අතර, පසුගිය ජුලි මස 12 වෙනිදා ලේඛන වෙනස් කර රේගුවෙන් පිටකර ගෙන තිබේ. එම කන්ටේනරය හෝ එහි තිබූ සුවඳ විලවුන් සහ ආලෝපන ඊයේ [ජුලි 18] පස්වරුව දක්වා සොයාගැනීමට ලැබී නැති බවත්, මෙවැනි දූෂිත ක්‍රියා හේතුවෙන් ශරීර සෞඛ්‍යට අහිතකර මෙන්ම පිළිකාකාරක සහිත ආලේපන වර්ග, ප්‍රමිතියෙන් තොර භාණ්ඩ, බාල ඖෂධ සහ පරිභෝජනයට නුසුදුසු ආහාර වර්ග වෙළෙඳපොලට යෑම වැළැක්විය නොහැකි බවත් රේගුවෙහි එම උසස් නිලධාරියා වැඩි දුරටත් සඳහන් කළේය.
