Passes Away – ශ්‍රී ලාංකේය සාහිත්‍ය ක්ෂේත්‍රයේ අත්දැකීම් බහුල,පළපුරුදු ප්‍රවීන ලේඛිකාවන් දෙපලක් සිය දිවි සැරිය නිම කොට තිබේ. ඒ, අනුල ද සිල්වා සහ සෝමා ටී. පෙරේරා යන මහත්මීන්ය. ඔවුන් දෙදෙනාගේම ඇති විශේෂත්වය වන්නේ පුවත්පත් කලාවේදිනියන් ලෙස කටයුතු කර තිබීම සහ විශිෂ්ට ඝනයේ පරිවර්තිකාවන් වීමය.
1941 ජනවාරි 27 දින අම්බලන්ගොඩ පොල්වත්ත ප්‍රදේශයේ උපත ලැබූ අනුල ද සිල්වා මහත්මිය 1941 වසරේදී සිය ප්‍රථම නවකතාව වන “උන්මන්තකයෝ” පාඨකයන් අතට පත් කළාය. ගුරුවරියක වශයෙන් ද කටයුතු කළ ඇය මිහිර ළමා පුවත්පත ඇතුළු පුවත්පත් අටක සේවය කර තිබුණාය. මායා බන්ධන,උත්තම ගැහැණු,නන්ද හා සරණ,තිත්ත කෝපි,දෙවියන්ගේ අඩවිය,මාතුබී මමයි,සමනළ හාදුව,අසම්මතය,කොන් කළ දෝණි,පාතාල ප්‍රේමය,අහස් මාළිගා,අත්තටු මැවිලා ඇගේ කෘතීන් අතරින් කිහිපයකි. අනුල ද සිල්වා මහත්මිය විසින් ශ්‍රී ලාංකික පාඨකයන්ට දායාද කළ කෘතීන් සංඛ්‍යාව 125 කට අධිකය. ඇය මියයන විට 82 වන වියෙහි පසුවූවාය.
1946 වර්ෂයේ දකුණේ බෙලිඅත්ත ප්‍රදේශයේ උපත ලද ඇය කුමරි,අරලිය,සඳරේණු,යුවතිපති වැනි යොවුන් සහ කාන්තා පුවත්පත් තුළින් පාඨකයන්ට සමීප වූවාය. සුදු හාමිනේ,හේමන්ත,නොපිරූ පිරුම්,ඉර හඳ යට හමුවී ඇගේ කෘතීන් අතරින් කිහිපයකි. ඇය විශ්ව සාහිත්‍යයේ ශ්‍රේෂ්ඨතම කෘතීන් රැසකම පරිවර්තන පාඨකයන්ට තිළිණ කළ ලේඛිකාවකි. ඇනා කැරනිනා,ජේන් අයර්,ඔලිවර් ට්විස්ට්,මහල්ලා සහ මුහුද ඒ අතරින් කිහිපයකි. ඇය මියයන විට 77 වන වියෙහි පසුවූවාය.
