පළාත් සභා ඡන්ද විශේෂ කාරක සභාවට විපක්ෂය නෑ

පළාත් සභා ඡන්ද විශේෂ කාරක සභාවට විපක්ෂය නෑ

පළාත් සභා ඡන්ද විමසීම කුමන මැතිවරණ ක්‍රමයක් යටතේ පැවැත්විය යුතුද යන්න සොයා බලා වාර්තා කිරීම සඳහා පත් කෙරුණු පාර්ලිමේන්තු විශේෂ කාරක සභාවෙන් විපක්ෂය ඉවත් වීමට තීරණය කර ඇත. ඒ එම කාරක සභාවේ කාලය එළැඹෙන දෙසැම්බර් මස 17 වැනිදා දක්වා දීර්ඝ කිරීමේ තීරණයට විරෝධය පළ කරමිනි. 

පසුගිය 11 වෙනිදා පාර්ලිමේන්තුවේදී අදහස් දැක්වූ අමාත්‍ය නලින්ද ජයතිස්ස පැවසුවේ මෙම කාරක සභාව සඳහා තවදුරටත් කාලය අවශ්‍ය බැවින් එම කාරක සභාවේ කාලය දෙසැම්බර් මස 17 වැනිදා දක්වා දීර්ඝ කළ බවය. කෙසේ වෙතත් මීට විරුද්ධත්වය ප්‍රකාශ කරමින් සමගි ජන බලවේගයේ මහ ලේකම් රංජිත් මද්දුමබණ්ඩාර පැවසුවේ මෙම කාරක සභාව රැස්වී මේ වන විට මාස 9ක් ගතව ඇති බවය. එමෙන්ම කාරක සභාවේ අරමුණ වනුයේ පළාත් සභා ඡන්දය ඉක්මනින් පැවැත්වීමට අදාළ කරුණු සාකච්ඡා කිරීම මිස මැතිවරණය කල් දැමීම නොවන බැවින් විපක්ෂයක් ලෙස ඉදිරියේදී එම කාරක සභාවට පැමිණීමෙන් වැළකීමට තීරණය කළ බවත් ඔහු අද පාර්ලිමේන්තුවේදී අදහස් දක්වමින් සඳහන් කළේය.

✍️ ධාරා අබේනායක විසිනි.