සොරකම වීරත්වයට නොනැඟූ චිත්රපටයක් – No Ordinary Heist
මෙම වසරේ අප්රේල් මස තිරගත වූ No Ordinary Heist චිත්රපටය සත්ය සිදුවීමක් පාදක කර ගත් කතාවක්. 2004 වසරේදී බෙල්ෆාස්ට් හි සිදු වූ කුප්රකට Northern Bank මංකොල්ලය පිළිබඳ කතාව මේ සඳහා පාදක වී තිබෙනවා. 2004 දෙසැම්බර් 20 දින උතුරු අයර්ලන්තයේ Belfast හි සිදුවූ මෙම දැවැන්ත මුදල් මංකොල්ලය බ්රිතාන්ය අයර්ලන්ත ඉතිහාසය තුළ සිදුවූ විශාලතම කොල්ලකෑම් වලින් එකක් ලෙස සැළකෙනවා. සන්නද්ධ කණ්ඩායමක් ලෙස ක්රියාත්මක වූ සොරුන් කොල්ලයට පෙර දින රාත්රියේ බැංකුවේ ජ්යෙෂ්ඨ නිලධාරීන් දෙදෙනෙකුගේ පවුලේ උදවිය ප්රාණ ඇපයට තබාගෙන ඔවුන්ගේ ජීවිත තර්ජනයට ලක් කරමින් නිලධාරීන් දෙදෙනාට බැංකුවේ ආරක්ෂක පද්ධති හා වෝල්ට් විවෘත කිරීමට බල කෙරුණ අතර පවුම් මිලියන 26.5ක මුදලක් සොරාගෙන පලා යෑමට සමත් වුණා. පසුව අයර්ලන්ත පොලීසිය සහ බ්රිතාන්ය රජය මෙම කොල්ලයට IRA සම්බන්ධ බව සැක කෙරූ නමුත් එය කිසිදා නිල වශයෙන් සනාථ නොවූ අතර සොරාගත් මුදලෙන් බහුතරය තවම සොයා ගැනීමට නොහැකි වී තිබෙනවා.
මේ චිත්රපටයේ විශේෂත්වය නම් සුපුරුදු පරිදි සොරකමක් වීරත්වයට නැගීමේ සම්ප්රදාය ඉවත දමා පැහැර ගැනීමට ලක්වූ බැංකු නිලධාරීන් දෙදෙනා වටා කතාව කේන්ද්ර වී තිබීමයි. මවත්, බිරිඳත් පැහැර ගැනීමට ලක්වූ ඔවුන් දෙදෙනා මුහුණ දුන් තත්වය, බිය, ආතතිය කතාව පුරාවටම දැකිය හැකියි. චිත්රපටය ආරම්භයේ සිටම පවසන්නේ මෙම නිලධාරීන් දෙදෙනා ඉතාමත් වාසි සහගත මංකොල්ලයකට සිය කැමැත්තෙන් සහභාගී වන අය නොවෙන බවයි. ඔවුන් දෙදෙනා පසුවන්නේ තම මවගේත් බිරිඳගේත් ජීවිත බේරා ගැනීම වෙනුවෙන් ඕනෑම දෙයක් කිරීමට සූදානම් තත්වයකයි. චිත්රපටයේ විශාලතම ශක්තීන්ගෙන් එකක් වන්නේ මෙම සැබෑ යථාර්ථයයි. කතාවේ පසුබිම සකස් කිරීමේදී වැදගත් කාර්යභාරයක් ඉටු කර තිබෙන අයුරු දැකිය හැකියි. නගරය අනාරක්ෂිත, සීතල, අළුපැහැති වෙහෙසට පත් ස්වභාවයක් උසුලන අතර, එමගින් වසර ගණනාවක් තිස්සේ මිනිසුන් මුහුණපාන දේශපාලන ආතතිය පිළිබිඹු කිරීමට සමත් වී තිබෙන අන්දම කැපී පෙනේ.
පැහැර ගැනීමට ලක් වූ තම බිරිඳ වෙනුවෙන් ධෛර්යය එක්කාසු කර ගැනීමට වෙහෙසෙන මංමුලා සහගත ප්රධානියෙකුත් ඔහු යටතේ සේවය කරන තරුණ බැංකු සේවකයා (මව පැහැර ගැනීමට ලක්වූ) යන දෙදෙනා රැකියා ස්ථානයේදී සමීප හිතවත්කමක් නොතිබූ දෙන්නෙක්. නමුත් සිදුවූ විපතත් සමගින් ඔවුන්ගේ සම්බන්ධතාවය ක්රමයෙන් වැඩි දියුණුවී එය චිත්රපටයේ ශක්තිය බවට පත් වෙන අන්දම බලා සිටීමට අපූරුයි. මුලදී, ඔවුන් අතර ආතතියක් සහ අවිශ්වාසයක් ඇති නමුත් බියජනක තත්වය ඔවුන් යම්කිසි අවබෝධයකට පත් කරනවා. එවන් බියජනක, අවිනිශ්චිත මොහොතක තිබූ එකම හොඳ දෙය නම් ඔවුන් සිය ආදරණීයයන් ගැන වඩ වඩාත් සැලකිලිමත් විය යුතු බව වටහා ගැනීමයි.
No Ordinary Heist චිත්රපටය විශේෂ වෙන්නේ එය කෙතරම් සංයමයෙන් යුක්තද යන කාරණාව මතයි. අපරාධකරුවන් ඝෝෂාකාරී, දුෂ්ටයන් ලෙස නිරූපණය නොකරන අතර ඔවුන්ගේ සන්සුන් භාවය සහ මෙහෙයවීම බිහිසුණුකම දෙගුණ තෙගුණ කරයි. ප්රචණ්ඩත්වය කලාතුරකින් දක්නට ලැබෙන අතර එය කොයි මොහොතේ පුපුරායාදැයි අවිනිශ්චිතය. චිත්රපටයේ තවත් සිත්ගන්නා කරුණක් වන්නේ එහි දේශපාලනය හැසිරවීමයි. කෙසේ වෙතත්, චිත්රපටය විශාල දේශපාලන පසුබිමට වඩා වින්දිතයින්ගේ පෞද්ගලික අත්දැකීම් කෙරෙහි අවධානය යොමු කිරීම අපූරුය. එහි සාමාන්ය ජනතාව පවතින ක්රමය සහ බලතල මගින් තලාපෙලා දැමීම සම්බන්ධයෙන් වැඩි ඉඩක් වෙන් වී ඇත.
