මතුපිටින් පෙනෙන දේ බොරුවක් – The Woman in Cabin 10 (2025)
සමහර දේවල් අපිට පෙනෙන්නෙ හරි perfect විදිහට. ඕනෙම දෙයක මතුපිටින් දකින්න ලැබෙන දේ ඇත්ත කියලා අපි විශ්වාස කරනව. ඒත් අපි වටේ තියෙන දේවල් ගැන ටිකක් විමසිල්ලෙන් බැලුවොත් ඒව මතුපිටින් පෙනෙන තරම් perfect නැති බව තේරෙනව. සමහරවිට යම් දෙයක් ගැන සැඟවුණු සත්‍යය අමිහිරි කටුක එකක් වෙන්න පුළුවන්.
ලෝරා එහෙම නැත්තම් “ලෝ” මාධ්‍යවේදිනියක්. ඇයට අවස්ථාව ලැබෙනව ධනවතෙක්ට අයත් සුඛෝපභෝගී yatch එකක යාත්‍රා කරන්න. මේ යාත්‍රාව ගැන ලිවීම ඇයට බාර වෙලා තිබුණා. බිලියනපතියෙක් වුණ රිචඩ් තමයි මේකෙ හිමිකරු. රිචඩ් ගෙ බිරිඳ ඈන් ලියුකේමියා රෝගියෙක්. ධනවතුන් පිරුණ යාත්‍රාව ඇතුළෙ ඈන් ගොඩක් වෙලාවට හිටියෙ හුදකලාවම. එක්තරා රැයක ලෝට මුහුණ දෙන්න වුණ සිද්ධියකට පස්සෙ මීට පෙර cabin 10 එකේ තමන්ට දකින්න ලැබුණ යුවතියක් තව දුරටත් ඔවුන් එක්ක නැතිබව ඇයට තේරෙනව. ඒත් ලෝ කියන විදිහෙ කෙල්ලෙක්ව එතැන හිටිය කවුරුත් දැකලා තිබුණෙ නෑ. රස්සාවෙ පුරුද්ද නිසාම ලෝට තිබුණා නිශ්ශබ්දව ඉන්න බැරි ගතියක්. උදේ දවල් රෑ නොබලා ඇය මේ ගැහැණු ළමයව හෙව්වා. ඇයගෙ මේ වැඩ අනිත් මිනිස්සුන්ටත් හිසරදයක් වෙලයි තිබුණෙ. මෙතන මොකක් හරි ප්‍රහේලිකාවක් තියෙන වග ලෝට වැටහෙනව. ඇයට දකින්න ලැබුණ ඒ ගැහැණු ළමයා කවුද?
ඔය අතරෙ කවුරුහරි කෙනෙක් ලෝ ව මරන්න උත්සාහ කළා. අපි වටා ඉන්න අය සමහරවෙලාවට අපි වැරදියි කියනව. ඒත් අපිට අපි හරියි කියලා විශ්වාසයි නම්, අපි කරන්න ඕනෙ, ක්‍රියාත්මක වෙන්න ඕනෙ අපේ හිත කියන විදිහට. The Woman in Cabin 10 චිත්‍රපටය නිර්මාණය කරලා තියෙන්නෙ බ්‍රිතාන්‍ය ලේඛිකා Ruth Ware ගෙ The Woman in Cabin 10 කෘතිය ඇසුරෙන්.
