ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන මහතා මියගොස් සිටියදී ඔහුගේ දේහය අද (08) පෙරවරුවේ ඔහුගේ කොල්ලුපිටිය පිහිටි නිවසේදී සොයාගත් බව පොලිසිය පවසනවා.
එයාර් බස් ගනුදෙනුවකට අදාළව ඇමරිකානු ඩොලර් මිලියන දෙකක අල්ලසක් ලබාගැනීමේ චෝදනාව මත රක්ෂිත බන්ධනාගාරගතව සිටි ඒ මහතාට, ඇප කොන්දේසි උල්ලංඝනය කිරීමේ චෝදනාව යටතේ යළිත් අත්අඩංගුවට ගන්නා ලෙස කොළඹ මහෙස්ත්‍රාත් අධිකරණය ඊයේ (07) වරෙන්තු නිකුත් කර තිබුණා.
කපිල චන්ද්‍රසේන මහතාට ඇප තැබීමට ඉදිරිපත් වූ පුද්ගලයන් දෙදෙනා රුපියල් 15,000 ක මුදලකට පෙනී සිටි කුලී ඇපකරුවන් බවට ඊයේ දිනයේ අධිකරණය හමුවේ අනාවරණය වුණා.
ඔවුන් සැකකරු හඳුනන්නේවත් නොමැති බවත්, ව්‍යාජ තොරතුරු ඉදිරිපත් කර ඇති බවත් අනාවරණය වීමත් සමඟ අධිකරණය එම ඇපකරුවන් දෙදෙනා රක්ෂිත බන්ධනාගාරගත කර කපිල චන්ද්‍රසේන මහතාට යළි වරෙන්තු නිකුත් කළා.
2013 වසරේදී ශ්‍රී ලංකන් ගුවන් සමාගම සඳහා එයාර් බස් යානා 14ක් මිලදී ගැනීමේ ගනුදෙනුවේදී සිදුවූවා යැයි කියන අතිවිශාල මූල්‍ය වංචාව සම්බන්ධයෙන් කපිල චන්ද්‍රසේන මහතාට සහ ඔහුගේ බිරිඳට එරෙහිව අල්ලස් කොමිසම මගින් නඩු පවරා තිබුණා.
මෙම ගනුදෙනුවේදී අල්ලස් මුදල් ඕස්ට්‍රේලියාවේ බැංකු ගිණුමකට බැර කර ඇති බවට ජාත්‍යන්තර පරීක්ෂණවලදීද තොරතුරු හෙළි වී තිබුණා.
