කතානායකට එරෙහි විශ්වාසභංගය විවාදයට නොගන්නේ ඇයි?
ස්ථාවර නියෝග, ප්‍රතිශෝධන මායාවන් සහ ජාත්‍යන්තරයට යන විශ්වාසභංග අර්බුදය පිටුපස ඇති සැබෑ දේශපාලන චෙස් ක්‍රීඩාව. ගැන හිතමු. ශ්‍රී ලංකා පාර්ලිමේන්තු ඉතිහාසයේ තීරණාත්මක දේශපාලන ගැටුමක් නිර්මාණය කරමින්, කතානායක වෛද්‍ය ජගත් වික්‍රමරත්නට එරෙහිව විපක්ෂය ගෙන ආ විශ්වාසභංග යෝජනාව ඊයේ (නොවැම්බර් 03) විවාදයට නොගැනීමට ආණ්ඩුව තීරණය කර ඇත. සභානායක අමාත්‍ය බිමල් රත්නායක ප්‍රකාශ කරන්නේ විපක්ෂය සිය යෝජනාව පාර්ලිමේන්තු ස්ථාවර නියෝගවලට අනුකූලව සංශෝධනය කර නියමිත දිනට භාර නොදීම නිසා මෙම පියවර ගත් බවයි. කෙසේ වෙතත්, විපක්ෂය චෝදනා කරන්නේ මෙය කතානායකවරයා සහ ආණ්ඩුවේ මුහුණ බේරාගැනීම සඳහා සිතාමතා සිදුකළ දේශපාලන උපක්‍රමශීලී මඟහැරීමක් බවයි. මෙම ලිපියෙන් අප අප කතා කරනුයේ කතානායක විශ්වාසභංගය වටා ආණ්ඩුව ගසා ඇති දේශපාලන ගැට සහ ඉන් මතුවන ව්‍යවස්ථාපිත අර්බුදය ගැනය.
චෝදනා 50ක ලැයිස්තුව සහ ‘ස්ථාවර නියෝග’ ආයුධය
විපක්ෂ මන්ත්‍රීවරුන් 44 දෙනෙකුගේ අත්සනින් යුතුව කතානායකවරයාට එරෙහිව ඉදිරිපත් වූ විශ්වාසභංග යෝජනාව තුළ බරපතළ චෝදනා 50ක් අන්තර්ගතව තිබුණි. කතානායකවරයා පක්ෂග්‍රාහීව සහ ප්‍රජාතන්ත්‍රවාදී නොවන ආකාරයෙන් කටයුතු කරන බවටත්, ඔහු එම ධුරයට නුසුදුසු බවටත් විපක්ෂය සෘජුවම චෝදනා කළේය. නමුත් ආණ්ඩුව මෙහිදී භාවිත කළේ තාක්ෂණික උපක්‍රමයකි. යෝජනාවේ අන්තර්ගතය සම්බන්ධයෙන් නොව, එහි ආකෘතිය සහ වචන භාවිතය පාර්ලිමේන්තු ‘ස්ථාවර නියෝග’ (Standing Orders) වලට පටහැනි බව පවසමින් ආණ්ඩුව විපක්ෂයට බලපෑම් කළේ එය ප්‍රතිශෝධනය කරන ලෙසයි. ඔක්තෝබර් 28 වැනිදා අවසන් දිනය වන විට එම සංශෝධන නිසි පරිදි සිදුනොවූ බව පවසමින් විවාදය දින නියමයක් නොමැතිව කල් දැමීමට ආණ්ඩුව කටයුතු කළේය.
ආණ්ඩුව විවාදයට බය ඇයි?
දේශපාලන විචාරකයන් පෙන්වා දෙන පරිදි, මෙම විවාදය පාර්ලිමේන්තුව තුළ ගැනීමට ඉඩදීම ආණ්ඩුවට දැඩි අවාසිසහගත තත්ත්වයක් නිර්මාණය කරයි. විපක්ෂය පවසන පරිදි, මෙම විවාදය සජීවීව විකාශය වුවහොත් කතානායකවරයාට පමණක් නොව සමස්ත ආණ්ඩුවේ සදාචාරාත්මක භාවයටම ජනතාව හමුවේ දැඩි පහරක් එල්ල වේ. එමෙන්ම කථානායකවරයාට එරෙහිව අල්ලස් හෝ දූෂණ චෝදනා විමර්ශන කොමිෂන් සභාවේ පරීක්ෂණයක් පවතින බැවින්, ඔහු වහාම ධුරයෙන් ඉල්ලා අස්විය යුතු බවට විපක්ෂය කරන බලපෑමෙන් ඔහුව ආරක්ෂා කරගැනීමට ආණ්ඩුවට මෙම කල්මැරීමේ උපක්‍රමය භාවිතා කරන බව පෙනේ.
විපක්ෂයේ ප්‍රතිප්‍රහාරය
මෙම දේශපාලන ගැටයට එරෙහිව විපක්ෂය ද සිය ස්ථාවරය දැඩි කර ඇත.
යෝජනාව ඉල්ලා අස්කර නොගැනීම
සමගි ජන බලවේගයේ (SJB) මන්ත්‍රී අජිත් පී. පෙරේරා මහතා අවධාරණය කරන්නේ විශ්වාසභංග යෝජනාවක් පාර්ලිමේන්තු න්‍යාය පුස්තකයට ඇතුළත් කළ පසු එය එලෙසම පවතින බවත්, එය කිසිසේත් සංශෝධනය කිරීමට හෝ ඉල්ලා අස්කර ගැනීමට සූදානම් නැති බවත්ය.
