NPP Arrest show – යෝෂිත රාජපක්ෂගේ උපන් ගම වූ බෙලිඅත්තටම ගොස් ඔහුව අපරාධ පරීක්ෂණ දෙපාර්තමේන්තුවට ආදරයෙන් රැගෙන යෑම ලංකාවේ මාධ්‍යයන් සහ මාධ්‍ය ප්‍රකාශකයින්ට අනුව විස්තර කෙරෙන්නේ “නීති විරෝධී ලෙස උපයාගත් ආදායම් වලින් රත්මලාන ප්‍රදේශයේ ඉඩමක් සහ නිවසක් මිලදී ගැනීම සම්බන්ධයෙන් මුදල් විශුද්ධිකරණය වැළැක්වීමේ පනත යටතේ යෝෂිත රාජපක්ෂයට එරෙහිව විමර්ශනයක් පැවැත්වූ අතර ඊට අදාළව අපරාධ පරීක්ෂණ දෙපාර්තමේන්තුව විසින් අද පෙරවරුවේ ඔහු අත්අඩංගුවට ගනු ලැබීය.” යනුවෙනි.
මාධ්‍යයට නිකුත්ව ඇති ජායාරුප සහ වීඩියෝ දර්ශන වලට අනුව නම්, යෝෂිත රාජපක්ෂ “අත් අඩංගුවට” ගත් බවක් අපට දැනෙන්නේ නැත. “ඩුවල් ඒ.සී” වෑන් රථයක බොහොම පරෙස්සමෙන් කැඳවාගෙන ගොස්, කටඋත්තර දෙන ගමන් “යෝ යෝ ” එකක් දෙන පිංතුරයක් සමාජ මාධ්‍යයටද දමා, කොළඹ අතිරේක මහේස්ත්‍රාත්වරියගේ නිල නිවස තුළ අධිකරණ කටයුතු නිමවා, රෑ දෙකක් ගෙවලා එන්නැයි බන්ධනාගාරයට යවා ඇත්තේ එදින සිකුරාදා දිනයක් වූ නිසා විය හැකිය.
මෙලෙසම 2016 වසරේ යහපාලන ආණ්ඩුවෙන්ද යෝෂිත රාජපක්ෂව බන්ධනාගාර සවාරියක් රැගෙන යන ලදී. තවද පසුගිය ජනවාරි 3 වෙනිදා පය දෙකකට අපරාධ පරීක්ෂණ දෙපාර්තමේන්තු “විසිට්” එකක් ගොස් තිබිණි. එමෙන්ම හිටපු ජනපති මහින්ද රාජපක්ෂගේ පෞද්ගලික ආරක්ෂක මේජර් නෙවිල් වන්නිආරච්චිගෙන් සහ හිටපු ජනපති ගෝඨාභය රාජපක්ෂගෙන්ද කතරගම පිහිටි ඉඩමක් සම්බන්ධව අපරාධ පරීක්ෂණ දෙපාර්තුමේන්තුව ප්‍රකාශ සටහන් කරගත් ප්‍රවෘත්තීන් අපට මතකය. ඒ සියල්ල බොහෝ සාමකාමී ය. සමාජ මාධ්‍ය වෙත මුදාහැර තිබු යෝෂිත රාජපක්ෂ සිනහමුසුව ඔසවා පෙන්වන ඇඟිලි දෙකෙන් කියනුයේ NPP ආණ්ඩුව කියන “සියල්ලට ඉහළින් ඇති නිතිය” රාජපක්ෂලාට කොතරම් හීලෑද යන්න නොවේද…?
