Dan Priyasad – දේශපාලන ක්රියාකාරිකයකු වන ඩෑන් ප්රියසාද් වෙඩිතබා ඝාතනය කිරීමේ සිද්ධිය සම්බන්ධයෙන් වැල්ලම්පිටිය පොලීසිය අද (අප්රේල් 23) කොළඹ මහේස්ත්රාත් අධිකරණයට කරුණු වාර්තා කර තිබිණි. අධිකරණය හමුවේ කරුණු දක්වමින් පොලීසිය සඳහන් කර තිබුණේ මෙම අපරාධයට පිය පුතු දෙපළකගේ සම්බන්ධයක් පවතින බවට සැක කළ හැකි තොරතුරු පරීක්ෂණවලදී හෙළිවී ඇති බවයි.
ඒ අනුව මෙම පිය පුතු දෙපළගේ විදේශ ගමන් තහනම් කිරීමේ නියෝගයක් නිකුත් කරන ලෙසත්, ඔවුන්ගේ දුරකථන වාර්තා කැඳවීමේ නියෝගයක් නිකුත් කරන ලෙසත් පොලීසිය අධිකරණයෙන් ඉල්ලා ඇත. එම ඉල්ලීමට අවසර දුන් කොළඹ අතිරේක මහේස්ත්රාත් හර්ෂණ කැකුණවල මහතා අදාළ පුද්ගලයින් දෙදෙනා විදේශගතවීම වළක්වාලමින් ආගමන හා විගමන පාලකවරයා ඇතුළු නිලධාරීන් වෙත නියෝගයක්ද නිකුත් කර තිබේ.
වැඩිදුරටත් කරුණු දැක්වූ පොලීසිය ඩෑන් ප්රියසාද්ගේ සහෝදරයෙකු වන තිළිණ ප්රසාද් නමැත්තා මීට වසර කිහිපයකට ඉහතදී කපා කොටා ඝාතනය කර තිබූ බවත්, ඒ සම්බන්ධයෙන්ද මෙම පිය පුතු දෙදෙනාට එරෙහිව අධිකරණය හමුවේ නඩුවක් පවතින බව පවසා ඇති අතර සිද්ධියට අදාළව මේ වන විට පුද්ගලයින් 10 දෙනෙකුගෙන් පමණ ප්රකාශ සටහන් කරගෙන තිබෙන බවත් ඉදිරි විමර්ශන සිදු කරන බවත් අධිකරණයට දැනුම් දී තිබේ.
