වැලිපැන්න පොලීසියට අනුයුක්තව රාජකාරී සිදු කළ සැරයන්වරයෙකු අලුත්ගම – මතුගම මාර්ගයේ ගමන් ගත් යතුරුපැදියක ගැටී මිය ගොස් ඇති බව වැලිපැන්න පොලීසිය පවසනවා.
මෙසේ මියගොස් ඇත්තේ අහුංගල්ල ප්‍රදේශයේ පදිංචි වයස අවුරුදු 54 ක් වූ ගොඩැල්ලගේ උපුල් සමන්ත නැමැති පොලිස් සැරයන්වරයෙකු බවයි පොලීසිය සඳහන් කළේ.
ඊයේ (15) රාත්‍රියේ ජීප් රථයකින් අලුත්ගම – මතුගම මාර්ගයේ ලබුවැල්ගොඩ මංසන්ධියේ රාජකාරියේ නිරතව සිටි පොලිස් නිලධාරීන් කණ්ඩායමක් එම මාර්ගයේ අධික වේගයෙන් ගමන් ගත් යතුරුපැදියක් නවත්වන ලෙස සංඥා කර ඇති අතර, එහි දී වේගය පාලනය කර ගත නොහැකි වූ යතුරුපැදිය රාජකාරියේ නිරතව සිටි පොලිස් සැරයන්වරයාගේ ගැටී, පොලිස් සැරයන්වරයා විසි වී ගොස් අසල කාණුවකට වැටී හිසට බරපතළ තුවාල සිදු වී මියගොස් තිබෙනවා.
යතුරුපැදිකරු ද සුළු තුවාල ලබා අලුත්ගම රෝහලට ඇතුළත් කිරීමෙන් අනතුරුව, වැඩිදුර ප්‍රතිකාර සඳහා කළුතර ශික්ෂණ රෝහල වෙත මාරු කර යවා ඇති අතර, අනතුර සම්බන්ධයෙන් වැලිපැන්න පොලීසිය ඉදිරි විමර්ශන සිදු කරනවා.
