SL vs NZ T 20 – ශ්‍රී ලංකා කණ්ඩායම සහ නවසීලන්ත කණ්ඩායම අතර පැවැත්වෙන තරඟ 3කින් සමන්විත විස්සයි විස්ස ක්‍රිකට් තරඟාවලියේ පළමු තරඟය අද (දෙසැ: 28) නවසීලන්තයේ Mount Maunganui හිදී ආරම්භ විය. එය, නවසීලන්තය සහ ශ්‍රී ලංකාව අතර පැවැත්වෙන 26 වන T20 තරඟය ලෙස, ශ්‍රී ලංකා වේලාවෙන් පෙ.ව. 11.45 ට ආරම්භ වූ අතර රාත්‍රී තරඟයක් වේ. අද තරඟයට අදාළ සියලු ප්‍රවේශපත් මේ වනවිට අලෙවි වී අවසන් බව නවසීලන්ත ක්‍රිකට් ආයතනය පවසයි.
මෙම ක්‍රිකට් තරඟය පැවැත්වෙන Mount Maunganui ක්‍රීඩාංගනයේ විශේෂත්වය වන්නේ ක්‍රීඩාලෝලීන් 10,000කට අධික සංඛ්‍යාවකට එකවර නැරඹිය හැකි වීම සහ අති බහුතර ප්‍රමාණයක් වෙන්කර ඇත්තේ බිම වාඩිවී තරඟ නැරඹීම සඳහා වීමයි. කෙසේ වෙතත්, මෙතෙක් දෙරට අතර නවසීලන්තයේදී පවත්වා ඇති T20 තරඟ 8 න් ශ්‍රී ලංකාව ජයගෙන ඇත්තේ එක් තරඟයක් පමණි. තත්වය එසේ තිබියදී, මෙම ක්‍රීඩාංගනයේදීම දෙසැම්බර් 30 වනදා පැවැත්වෙන තරඟයේ ද දැනට ඉතිරිව ඇත්තේ ප්‍රවේශපත් කිහිපයක් පමණක් බව නවසීලන්ත ක්‍රිකට් ආයතනය පවසයි.
