Substandard vaccines – නිසි ප්‍රමිතියකින් තොර එන්නත් ලබාදීම හේතුවෙන් තමන් පුර්ණ අන්ධභාවයට පත්වුයේ යැයි චෝදනා කරමින්, ඊට වන්දි ලෙස රුපියල් කෝටි 10ක මුදලක් අයකර දෙන ලෙස ඉල්ලා, හිටපු සෞඛ්‍ය ඇමති ඇතුළු පිරිසකට එරෙහිව සිවිල් පුරවැසියන් තිදෙනෙකු විසින් කොළඹ දිසා අධිකරණය හමුවේ නඩු පවරා තිබේ. කඳපොළ ප්‍රදේශයේ පදිංචිකරුවෙකු වන මක්කාරි රාජරත්නම් මහතා ඇතුළු පැමිණිලිකරුවන් තිදෙනා ගොනුකර ඇති එම වන්දි නඩුවල වගඋත්තරකරුවෙකු ලෙස එම එන්නත් නිෂ්පාදනය කළේ යැයි කියන ඉන්දියාවේ ගුජරාට්හි හි පිහිටි ඉන්දියානා හා ඔප්ටිමික්ස් සමාගම් ද නම් කර ඇත.
නීතිඥ සම්පත් විජේවර්ධන, තමාලි කුරුප්පු හා නීතිඥ සුවින්තා රත්නසේකර යන නීතිඥවරුන් මගින් ගොනු කර ඇති මෙම නඩුවල සෙසු වගඋත්තරකරුවන් ලෙස සෞඛ්‍ය අමාත්‍යංශයේ හිටපු ලේකම් ජනක ශ්‍රී චන්ද්‍රගුප්ත, ඖෂධ නියාමන අධිකාරියේ හිටපු සභාපති මහාචාර්ය එස්.ඩී. ජයරත්න, වෛද්‍ය විජිත් ගුණසේකර, සෞඛ්‍ය අමාත්‍යංශයේ අධ්‍යක්ෂ ජනරාල් වෛද්‍ය අසේල ගුණවර්ධන, අක්ෂි වෛද්‍ය විශේෂඥ රෝහණ එදිරිසිංහ, චමි කේ‍රමිස් ප්‍රයිවට් ලිමිටඩ් හා නීතිපතිවරයා ඇතුළු 11 දෙනෙකුගේ නම් සඳහන් බව වාර්තා වේ.
