Ranil Wickramasinghe – එක්සත් ජාතීන්ගේ මානව හිමිකම් කවුන්සිලය ගාසා තීරයේ අර්බුදය සම්බන්ධව එක් ආකාරයකටත්, ශ්‍රී ලංකාවේ මානව හිමිකම් සම්බන්ධයෙන් තවත් ආකාරයකටත් විනිශ්චය කිරීමේ සාධාරණත්වයක් නොමැති බව පවසන ජනාධිපති රනිල් වික්‍රමසිංහ, ලබන සැප්තැම්බර් මස පැවැත්වෙන මානව හිමිකම් කවුන්සිලයේ මීළඟ සැසිවාරයේදී පිරිසිදු දෑතින් පැමිණෙන ලෙස එක්සත් ජාතීන්ගෙන් සංවිධානයෙන් ඉල්ලා සිටින බව කියා සිටියේය. ජනාධිපතිවරයා මේ බව කියා සිටියේ, ඊයේ [3 වෙනි සිකුරාදා] වැලිමඩ අධිකරණ සංකීර්ණය විවෘත කිරීමේ උත්සවය අමතමිනි.
මානව හිමිකම් ප්‍රශ්න සම්බන්ධයෙන් එක්සත් ජාතීන්ගේ සංවිධානය ක්‍රියා කරන ආකාරය රටකින්,රටකට වෙනස් වන්නේනම්, එය අසාධාරණ බවත් එවැනි තත්වයක් තුළ ඔවුන් අප රටේ ගැටළු සම්බන්ධව නගන ප්‍රශ්නවලට රටක් ලෙස පිළිතුරු සැපයිය යුතු දැයි ප්‍රශ්න කළ ජනාධිපතිවරයා, එක්සත් ජාතීන්ගේ සංවිධානය පිරිසිදු දෑතින් ශ්‍රී ලංකාව ප්‍රශ්න කිරීමට පැමිණෙන්නේනම්, රටක් ලෙස ඔවුන් නගන ප්‍රශ්න වලට පිළිතුරු ලබා දෙන බව එහිදී ජනාධිපතිවරයා අවධාරණය කර සිටියේය.
Photo Credits: President Media Division
